Skandal në një kopsht në Teksas: Mësuesja akuzohet për keqtrajtim të rëndë të një vogëlusheje

Një mësuese parashkollore në Teksas është akuzuar se ka terrorizuar një vajzë katërvjeçare nën kujdesin e saj, duke e tërhequr zvarrë nëpër klasë dhe duke i thënë se prindërit e saj “nuk e duan”.

Justice Thomas, mësuese në shkollën Trinity Lutheran School and Early Childhood Center në San Angelo, dyshohet se “i ka bërtitur, e ka poshtëruar dhe e ka trajtuar me forcë” një vajzë të vogël në vitin 2021, sipas një padie të siguruar nga Daily Mail, transmeton Klankosova.tv. Padia, e ngritur nga prindërit Patrick dhe Mellissa Killingsworth, pretendon se mësuesja i ka tërhequr me forcë krahun vajzës, e ka mbyllur vetëm në një dollap të errët dhe madje e ka kërcënuar se do të thërriste policinë kundër saj. Në dokumentet gjyqësore, vajza identifikohet vetëm me inicialet P.K. Sipas akuzave, Thomas madje ka nxitur edhe një fëmijë tjetër të marrë pjesë në keqtrajtimin e vajzës. Një nxënës thuhet se i ka bërtitur asaj: “Do të mbyllesh në një birucë!”

“Vajza iu nënshtrua vazhdimisht të bërtiturave, ulërimave, talljeve, poshtërimeve, shtyrjeve, tërheqjeve me forcë, zvarritjes dhe goditjeve, duke e ndryshuar përgjithmonë”, thuhet në padi.

Familja Killingsworth pretendon se drejtuesit e shkollës nuk ndërhynë për të ndalur situatën dhe nuk ruajtën prova të rëndësishme, përfshirë orë të tëra pamjesh nga kamerat e sigurisë, të cilat thuhet se mungonin pikërisht në ditën e incidentit. Mesazhet e përfshira në dosjen gjyqësore tregojnë se drejtoresha dhe drejtori i shkollës kishin marrë për më shumë se katër muaj paralajmërime të qarta nga Thomas, e cila shprehte shqetësimin se po i afrohej një “krize të shëndetit mendor”. Në një mesazh veçanërisht shqetësues, Thomas u kishte shkruar drejtuesve të shkollës se “makthi i saj më i keq” ishte të pësonte një “shpërthim emocional në punë” një frikë që ajo e kishte shprehur disa muaj përpara incidentit që përfshinte vajzën P.K.