Lajmet e fundit
Situata e Kosovës ndryshon krejtësisht me atë të shtetit palestinez.
Ministria e Jashtme, përmes këshilltares për media Elena Aljarilla Cortezon, deklaroi për Radio Evropa e Lirë, se Spanja nuk ka ndryshuar qëndrim për shtetësinë e Kosovës, duke mbetur kështu një nga pesë vendet e Bashkimit Evropian që nuk e kanë njohur Kosovën, transmeton Klankosova.tv
Sipas saj, vendimi i marrë më 28 maj, për të njohur zyrtarisht shtetësinë e Palestinës, është në përputhje me ligjin ndërkombëtar, parimet e Kartës së Kombeve të Bashkuara dhe rezolutave të Këshillit të Sigurimit të Kombeve të Bashkuara, të cilat janë detyruese, pasi të miratohen.
Çështja e njohjes së Kosovës nga Spanja është diskutuar në takimin e ministrave të Jashtëm të BE-së, më 27 maj në Bruksel.
Disa burime i kanë thënë Radios Evropa e Lirë se në këtë pikë ka pasur grindje të hapur ndërmjet palëve nga Gjermania dhe Spanja.
Derisa Gjermania ka qenë "shumë bindëse" për njohjen e Kosovës, "Spanja ishte në mbrojtje, duke argumentuar se Kosova nuk ishte në agjendë".
Në linjë me Spanjën, shtetësinë palestineze e ka njohur të martën edhe Norvegjia.
Irlanda do të veprojë njëjtë, më vonë gjatë ditës.
Që nga shpallja e pavarësisë në vitin 1988, mbi 140 shtete e kanë njohur pavarësinë e shtetit palestinez.
Kryeministri i Spanjës, Pedro Sanchez, ka thënë në mëngjes se vendi i tij do ta njohë shtetësinë palestineze, duke përfshirë Rripin e Gazës dhe Bregun Perëndimor me Jerusalemin Lindor si kryeqytetin e tij.
Ai ka thënë se Spanja nuk do të njohë asnjë ndryshim të kufijve të përcaktuar më 1967, përveç nëse pajtohen palët.
Spanja është një prej pesë vendeve të Bashkimit Evropian, që bashkë me Qipron, Greqinë Sllovakinë dhe Rumaninë, që nuk e njohin shtetësinë e Kosovës, të shpallur në shkurt të vitit 2008.
