Sinner fshinë “fantazmat”, pas Popyrin dhe Shapovalov tani përballë Auger-Aliassime

Jannik Sinner po e kthen US Open në turneun e shpagimeve. Pas fitoreve ndaj Alexei Popyrin dhe Denis Shapovalov, dy kundërshtarë që dikur i kishin shkaktuar humbje të dhimbshme, italiani ka tani përpara kanadezin Felix Auger-Aliassime. Sinner ka treguar forcë dhe pjekuri në rrugëtimin e tij në Flushing Meadows: kundër Popyrin fitoi bindshëm 3-0, ndërsa ndaj Shapovalov përballoi një betejë prej më shumë se tre orësh, duke lënë pas një tjetër kapitull të errët të karrierës së tij. Tashmë sfida më e madhe është Auger-Aliassime, që e kishte mundur dy herë në të kaluarën. Por gjërat kanë ndryshuar: vetëm dy javë më parë në Cincinnati, numri 1 i botës e mposhti kanadezin me një 6-0 6-2 të pastër. Në Nju Jork, Sinner kërkon të mbyllë një tjetër llogari të hapur dhe të vazhdojë rrugën drejt finales së madhe.