Shpresojmë që 1 Qershori i ardhshëm të na gjejë në një situatë më të mirë

Sot, në ditën e parë të këtij muaji u vendos që kjo datë të shënohet për të gjithë fëmijët anembanë botës. Sot, kjo ditë iu kushtohet pikërisht fëmijëve të cilët janë pjesa më e bukur dhe më e këndshme e shoqërisë dhe pa të cilët asgjë nuk do të kishte kuptim. Sot, është dita kur përmes lojës, festës e argëtimit, fëmijët e ngrisin zërin për të kërkuar të drejtat e tyre. Sot, është dita kur ne duhet të ngrisim zërin posaçërisht për të drejtat e fëmijëve me aftësi të kufizuara dhe të kujtojmë se edhe ata sot e shënojnë 1 Qershorin. Këtë 1 Qershor, fëmijët me aftësi të kufizuara e shënojnë duke vazhduar të jenë të harruar nga shoqëria, shteti si dhe insitucionet. E them këtë, për shkak se ende shumë fëmijë me aftësi të kufizuara nuk kanë qasje në insitucione publike dhe shkolla. Nuk kanë teknologji asistive të nevojshme për të ndjekur mësimin. Nuk kanë mjaftueshëm mësues asistent. Nuk kanë mundësi për çasje të barabartë në aktivitete zhvilluese e rekreative. Sot, duhet ta kthejmë kokën kah fëmijët me aftësi të kufizuara. Duhet t'i dëgjojmë kërkesat e tyre dhe t'i ofrojmë gjithpërfshirje e mundësi të barabarta. Fëmijët me aftësi të kufizuara, sikur të gjithë fëmijët e tjerë, kanë të drejtë për një ëmijëri të lumtur dhe të plotë. Prandaj sot, me zemrën plot besim e shpresë, shprehim fjalët më të ëmbla që dalin nga shpirti dhe shpresojmë shumë që 1 Qershori i ardhshëm, t'i gjejë në një situatë më të mirë fëmijët me aftësi të kufizuara. TEAM RIJAD është pranë fëmijëve me aftësi të kufizuara duke avokuar çdo ditë për një jetë më të mirë për ta. Urime 1 Qershori për të gjithë fëmijët anembanë botës!