Shfaqja dans teatër “Totem dhe Tabu” me dy prezantime në Kroaci

Qendra Artpolis, Unionit Shqiptar në Kroaci dhe Shoqata e Shqiptarëve të Prefekturës së Istrës, edhe këtë vit kanë vazhduar me prezantimin e veprave artistike bashkëkohore. Në dy qytete kroate do të prezantohet shfaqja dans teatër “Totem dhe Tabu”, me regji e koreografi të Robert Nuhës, e dramaturgji të Zana Hoxhës. “Totem dhe Tabu” do të jepet premierë para publikut në Kroaci më 24 nëntor nga ora 18:00 në “Dom Branitelja” në Pula, derisa më 25 nëntor nga ora 19:00 do të prezantohet në Zagreb në Teatrin “Vidra”. “Totem dhe Tabu”, është tandem eksperimental i dansit kontemporan dhe tekstit minimal që mundëson reflektimin e audiencës lidhur me çështjet e ngritura të cilat ngërthejnë jetën e tyre dhe mentalitetin kosovar. Shfaqja ngrehë pikëpyetje për situata dhe shqetësime të mëdha shoqërore, trauma, ndikimin e pandemisë dhe hipokrizinë shoqërore por pa arritur në konkludime dhe me qëllim që të prekë në thellësinë e përjetimeve, emocioneve dhe ngjarjeve të cilat vijnë në formë imazhesh dhe monologjeve, transmeton Klankosova.tv.