Shënoi golin e vetëm në derbin e Gjilanit, Tusha zgjidhet "Ylli i Javës" në Superligën e Kosovës

Federata e Futbollit të Kosovës ka përzgjedhur "Yllin e Javës", çmim ky që i dedikohet futbollistit më të dalluar të javës në Superligën e futbollit kosovar. Për javën e njëzet e gjashtë të këtij edicioni, ky çmim i është ndarë futbollistit të FC Drita, Veton Tusha, i cili shënoi të vetmin gol në derbin e qytetit kundër rivalit SC Gjilani, i cili përfundoi me rezultat 0:1, shkruan klankosova.tv. Vlerësimi për ndarjen e këtij çmimi është bërë nga nga Komisioni i Veteranëve të Futbollit. Tusha pas pranimit të çmimit u shpreh i lumtur për vlerësimin duke potencuar se derbi ndaj Gjilanit është gjithmonë ndeshje e vështirë. “Derbi është gjithmonë i vështirë, por jam i lumtur që e kemi fituar. Atmosfera në skuadrën tonë është shumë e mirë dhe do të luftojmë nga xhiro në xhiro që në fund të kurorëzohemi me titullin kampion. Ky çmim i dedikohet ‘Intelektualëve’. Falënderoj bashkëlojtarët e mi, stafin e trajnerëve dhe familjen time që gjithmonë më qëndrojnë afër.”, tha ai për faqen zyrtare të FFK-së./Klankosova.tv.