Serbia mund të përballet me dënime të reja pas incidenteve kundër Anglisë

FIFA dhe UEFA pritet të marrin masa kundër Federatës Serbe të Futbollit për shkak të sjelljes së tifozëve të tyre gjatë fitores së Anglisë në ndeshjen kualifikuese të Botërorit në Beograd. Thomas Tuchel siguroi fitoren e tij më mbresëlënëse si trajner i Anglisë, me “Tre Luanët” që shënuan një fitore të thellë 5-0 në stadiumin “Rajko Mitiq” të martën në mbrëmje. Ndërsa për Anglinë ishte një rezultat perfekt, për Serbinë nata ishte katastrofike, dhe mund të bëhet edhe më keq për shkak të sjelljes së tifozëve të tyre. Ndeshja u zhvillua në një stadium pjesërisht të mbyllur si dënim për thirrje raciste në një ndeshje të mëparshme kundër Andorrës, me 15 për qind të stadiumit të mbyllur. Federata Serbe e Futbollit publikoi një deklaratë para ndeshjes duke u bërë thirrje tifozëve që të silleshin mirë, duke shtuar se organi drejtues ishte gjobitur me gjithsej 700 mijë euro nga FIFA dhe UEFA gjatë pesë viteve të fundit për shkak të shkeljeve të përsëritura nga tifozët serbë, transmeton Klankosova.tv. Por mesazhi duket se u injorua kundër Anglisë, pasi disa incidente njollosën ndeshjen. Para fillimit, tifozët serbë u dëgjuan me thirrjet "Kosova është Serbi". Gjithashtu, tifozët vendas u panë duke valëvitur një banderolë provokuese me një hartë të Kosovës të mbuluar me ngjyrat e flamurit serb. Më vonë, loja u ndërpre për pak çaste pasi një lazer u drejtua nga tribuna në fytyrën e Konsa. Shpejt pas rifillimit, nëpërmjet altoparlantëve u dha një mesazh paralajmërues për tifozët që të mos përdorin lazerë dhe piroteknikë. Gjatë gjithë ndeshjes u dëgjua gjithashtu një fishkëllimë e vazhdueshme nga tifozët serbë. Kjo shkaktoi konfuzion në minutat e fundit të ndeshjes, pasi lojtarët dhe gjyqtarët menduan se loja kishte përfunduar 30 sekonda më herët, përpara se gjyqtari Clement Turpin të sinjalizonte vazhdimin e lojës. Ndërkohë, në një incident të veçantë, policia u detyrua të hynte në tribuna pasi tifozët vendas filluan të këndonin këngë kundër qeverisë. FIFA dhe UEFA ende nuk kanë dhënë një deklaratë mbi incidentet e ndodhura, por pritet që Federata Serbe të përballet me sanksione të tjera, përfshirë gjoba të reja dhe mbyllje të stadiumit.