Scott Carson e fitoi me Liverpoolin, tash e synon me Cityn në vendin e njëjtë

Scott Carson – i cili do të jetë në stol sonte për Manchester Cityn në ndeshjen e tyre finale të Ligës së Kampionëve me Interin – është një emër që duket se ka ekzistuar përgjithmonë, dhe arsyeja është se i njëjti kishte përjetuar një finale magjike pikërisht në Stamboll. Portieri 37-vjeçar ishte në stol edhe në finalen e vitit 2005 për Liverpoolin në fitoren e tyre legjendare ndaj Milanit. Akoma më i spikatur është fakti se finalja e sotme do të zhvillohet në stadiumin Ataturk të Stambollit, në të njëjtin vend me natën magjike të Liverpoolit. Nëse Man City do të fitonte këtë mbrëmje, Carson do të ishte në stol për dy finale të Ligës së Kampionëve, me 18 vjet diferencë, në të njëjtin stadium dhe kundër një ekipi nga Milani në të dyja ndeshjet. Dhe ai nuk do të ketë luajtur asnjë minutë në asnjërën prej tyre. Një intervistë e vitit 2017 me Carson tregoi historinë e përpjekjes për t'i dhënë medaljen e tij të Ligës së Kampionëve në vitin 2005, shokut të skuadrës Chris Kirkland. "Kur morëm medaljet, unë u përpoqa t'ia jepja timen Chrisit. Ai luajti më shumë ndeshje në fazat e grupeve se unë. Kështu që ndjeva se ai e meritonte më shumë", tha Carson. "Por Chris, siç do të thotë kushdo që e njeh, është një djalë shumë i mirë dhe ai tha: "Jo. Ti ishe në stol, edhe ti luaje rolin tënd". Natyrisht, jam i kënaqur që e kam marrë, por mendoj se një medalje është shumë më e vlefshme për ty nëse luan. Për mua, vetëm të dëshmoja atë natë ishte mjaft e mirë", kishte thënë Carson. /Klankosova.tv.