Salman Rushdie shfaqet në publik për herë të parë pas sulmit që e la gjysmë të verbër

Shkrimtari i njohur Salman Rushdie duket se e ka marrë veten pas një sulmi në gushtin e kaluar që e la të plagosur rëndë, por ai ende po lufton për të shkruar, tha shkrimtari në intervistën e tij të parë që nga incidenti. Romancieri i vlerësuar me shumë çmime iu desh të hynte në operacion pasi u godit me thikë në skenë përpara mbajtjes së një leksioni më 12 gusht në Institutin Chautauqua pranë Buffalo. "Ekziston një gjë e tillë si P.T.S.D., ju e dini", i tha Rushdie The New Yorker. “E kam pasur shumë, shumë të vështirë të shkruaj. Unë ulem të shkruaj dhe asgjë nuk ndodh. Unë shkruaj, por është një kombinim i boshllëqeve dhe i hedhurinave, gjëra që i shkruaj dhe që i fshij të nesërmen. Unë nuk kam dalë ende nga ai pyll, vërtet”, u shpreh Rushdie. Rushdie, 75 vjeç, i lindur në Indi, thuhet se pësoi plagë me thikë në qafë dhe fytyrë, dorën e majtë dhe bark. Sulmi e la atë të verbër në syrin e djathtë. Ai tani ka probleme me shtypjen për shkak të “mungesës së ndjenjës” në majë të gishtave dhe shkruan “më ngadalë”, tha ai për revistën, përcjell Klankosova.tv "Lëndimet e mëdha janë shëruar, në thelb", tha Rushdie. “Kam ndjesi në gishtin e madh dhe tregues dhe në gjysmën e poshtme të pëllëmbës. Unë jam duke bërë shumë terapi duarsh dhe më kanë thënë se po ia kaloj shumë mirë”. Autoritetet e identifikuan sulmuesin si Hadi Matar, i cili u deklarua i pafajshëm për akuzat për tentativë vrasje dhe sulm. Rushdie ka më shumë se një duzinë romanesh, duke përfshirë "Midnight's Children" të vitit 1981, i cili fitoi çmimin prestigjioz Booker. Romani i tij i vitit 1988 "Vargjet Satanike" u akuzua për blasfemi brenda komunitetit mysliman, me Iranin që nxori një ‘fetva’ që kërkonte vdekjen e tij. Rushdie u fsheh dhe trazirat çuan në të paktën 45 vdekje. Përkthyesi japonez i librit u godit me thikë për vdekje në vitin 1991.