Rita Ora me të dashurin do të jenë nikoqirë të "MTV EMA's 2022"

Këngëtarja e njohur shqiptare me famë ndërkombëtare dhe i dashuri i saj prej kohësh, regjisori Taika Waititi, do të jenë nikoqirë të ceremonisë së sivjetshme të “MTV Europian Music Awards 2022 (EMA’s)”. Evenimenti do të mbahet në Dusseldorf të Gjermanisë më 13 nëntor të këtij viti dhe i njëjti do të transmetohet në më shumë se 170 vende, shkruan E-News, transmeton Klankosova.tv. Ndjekësit e ceremonisë mund të votojnë të preferuarit e tyre përmes mesazheve telefonike në gjithsej 17 kategori. “Jemi të entuziazmuar të jemi nikoqirë në MTV EMA të këtij viti dhe të festojmë muzikantët dhe performancat më të mira nga e gjithë bota. Mezi presim ta ndajmë mbrëmjen me të gjithë këta artistë të talentuar”, kanë thënë Ora e Waititi në një deklaratë. “Jam e emocionuar që jam rikthyer si prezantuese dhe ndarja e skenës me Taikan e bën atë edhe më të veçantë. Ne i kemi të gjitha në EMA të këtij viti - surpriza, argëtim, modë, komedi dhe mbi të gjitha muzikë fantastike. Mezi presim që publiku të ndajë këto momente me ne”, ka shtuar Rita.