Ribotohet "Gjurmët LP" (FOTO)

Libri i Migjen Kelmendit “Gjurmët LP” është ribotuar sonte, njofton Klan Kosova. Autori Migjen Kelmendi ka thënë se u kujtuan ta ribotojnë librin, vetëm pas koncertit të mbajtur në Tiranë. “Kjo libër është ribotuar për rininë, të cilët nuk e mbajnë mend kohën kur kemi vepruar si grup”, ka thënë ai para të pranishmëve. “Në këto faqe është krejt historia e kohës kur bëhej rock, gjithçka rreth mënyrës si janë shkruar tekstet dhe si kemi vepruar si grup”. Libri ëshë një shënim i gjatë që përshkruan aspektet kulturore, politike dhe shoqërore të kohës kur kishte qenë aktiv grupi “Gjurmët Long Play”.

Ndonëse vetë ka shkruar libër, ai ka thënë ka vdekur koha “kur njerëzit janë ulur të lexojnë një libër nga fillimi në fund”. Librin e parë Kelmendi e kishte botuar në vitin 2001, ndërsa ribotimi është mbështetur nga Fondacioni "Unë e dua Kosovën". Ribotimi është shtypur në Vjenë dhe në të ka shumë fotografi me ngjyra dhe bardhë e zi – të cilat u shfaqën në prapavijë edhe gjatë promovimit. Parathëniet për ribotimin e librit "Gjurmët Long Play" i kanë shkruar Chris Keulemans (shkrimtar dhe ish-drejtor i Qendrës Kulturore në Amsterdam "De Balie"), Shkëlzen Maliqi (filozof dhe publicist) dhe Ragip Luta (ish-gazetar i seksionit shqip BBC.) Më promovimin e librit kanë marrë pjesë shumë figura të njohura nga bota e letërsisë, kulturës dhe medias.