Real Madrid kalon në gjysmëfinale të Champions League

Real Madridi ka kaluar në gjysmëfinale të Ligës së Kampionëve, pasi arriti ta eliminojë Chelsean në çerekfinale të kësaj gare. Ndeshja ishte spektakolare në “Santiago Bernabeu” dhe përfundoi me rezultatin 2:3 në të mirë të skuadrës nga Londra, por ishte e pamjaftueshme për të kaluar tutje. “Blutë” ishin duke udhëhequr me rezultatin 0 me 3, pas golave të shënuar nga Mason Mount, i cili shënoi në minutën e 15, Antonio Rudiger në të 51-tën dhe Timo Werner 75-tën. Kur skuadra e Thomas Tuchel dukej se po shkonte drejt gjysmëfinales, në skenë doli Rodrygo, i cili realizoi në minutën e 80, për ta dërguar ndeshjen në vazhdime. Në pjesën e parë të vazhdimeve, Karim Benzema shënoi në minutën e 96 për rezultatin 2:3, që ia siguroi Realit kalimin tutje me rezultatin e përgjithshëm 5:4. “Los Blancos” në gjysmëfinale do të takohen me fituesin nga ndeshja Atletico Madrid – Manchester City.