Ramos për Griezmann: Keni një injorancë të guximshme

Para fillimit të sezonit të ri të Ligës së Kampionëve, kapiteni i Real Madridit, Sergio Ramos, ka disa fjalë thumbuese për sulmuesin e Athletico Madrid, Antoine Griezmann. Francezi e ka konsideruar veten të një niveli me Leo Messin e Cristiano Ronaldon, pas një viti të suksesshëm me ekipin dhe kombëtaren e tij, shkruan Marca, transmeton Klan Kosova. “Injoranca e tij është vërtetë e guximshme”, ka thënë Ramos në konferencën për media. “Kur e dëgjoj këtë djalosh, më kujtohen Totti, Xavi, Raul, Iniesta, Iker... lojtarë që kanë shumë tituj dhe nuk e kanë fituar asnjëherë Topin e Artë”. Kapiteni i kampionëve aktualë të LK-së, ka thënë se trajneri Diego Siemone dhe mbrojtësi Diego Godin duhet ta këshillojnë atë. Sa i përket planeve të Realit që ta fitojnë titullin e katërt me radhë këtë sezon, një gjë e paparashikueshme në epokën moderne të futbollit, Ramos u shfaq “i uritur” për t’ua dëshmuar të gjithëve të kundërtën. “Ne ndjejmë krenari dhe përgjegjësi. Tre titujt e fituar nuk janë rastësi, duhet një ambicie e madhe për t’i fituar ato”, është shprehur ai. Real Madridi e pret Romën në Santiago Bernabeu të mërkurën në ora 21:00.