Rama thotë se propozimi i pranuar nga Kosova e Serbia për AKS-në është i BE-së - paralajmëron vizitë në Prishtinë

Kryeministri i Shqipërisë Edi Rama, ka thënë se vendi i tij do ta mbështesë fuqimisht Kosovën në zbatimin e Marrëveshjes Themelore, ndërsa do të vazhdojë të luajë rolin e saj në promovimin e paqes. Ai madje edhe ka paralajmëruar vizitë në Prishtinë lidhur me këtë çështje, ndërsa dhe konfirmon se draft-statuti është dokument i BE-së, transmeton klankosova.tv. ''Nuk mund të jem më krenar për kontributin e vendosur dhe konkret të Shqipërisë në procesin e vështirë në vazhdim të normalizimit të marrëdhënieve ndërmjet Kosovës dhe Serbisë. Megjithatë, draft-statuti i AKS-së i pranuar nga Kosova dhe Serbia si dokument i përshtatshëm pune, është draft i BE-së''. ''Shqipëria do ta mbështesë fuqimisht Kosovën në zbatimin e Marrëveshjes Themelore dhe do të vazhdojë të luajë rolin e saj në promovimin e paqes, stabilitetit dhe bashkëpunimit rajonal ndërmjet të gjitha vendeve në fqinjësinë tonë. Së shpejti do të shkoj në Prishtinë për të treguar personalisht mbështetjen time'', theksoi Rama në X.