Qëndrimi për një kohë të gjatë para ekranit, i rrezikshëm për shëndetin e fëmijëve

Gjetjet e një studimi të ri sugjerojnë se koha e kaluar para ekranit digjital nga fëmijët, është rritur ndjeshëm gjatë pandemisë COVID-19, duke rezultuar në rreziqe të mundshme për shëndetin fizik. Ekspertët e vizionit në Universitetin Anglia Ruskin (ARU) kanë shprehur shqetësimin se kjo mund të ndikojë në shikimin dhe shëndetin e përgjithshëm të fëmijëve, me disa kushte të lidhura me një rritje të kohës para ekranit. Pandemia e COVID-19 shkaktoi një lëvizje të paprecedentë drejt mësimit në distancë, me shumë vende që mbyllën shkollat e tyre. Studentët u lanë të mbështeteshin në pajisjet digjitale për të vazhduar shkollimin e tyre. Në Kanada, 89 për qind e prindërve pranuan se fëmijët e tyre po kalonin udhëzimet dyorëshe ditore të përcaktuara nga autoritetet shëndetësore të vendit. Në Gjermani, koha e ekranit ishte rritur me afërsisht një orë në ditë. Në Kili, një studim zbuloi se koha para ekranit mes të vegjëlve dhe fëmijëve parashkollorë ishte pothuajse dyfishuar në më shumë se tre orë në ditë, ndërsa në Tunizi studiuesit raportuan një rritje prej 111 për qind në kohën totale të ekranit për fëmijët e moshës 5-12 vjeç, përcjell Klankosova.tv Ndër rreziqet për shëndetin e syve që lidhen me përdorimin e pajisjeve digjitale janë sforcimi i syve, shikimi i paqëndrueshëm binocular (përdorimi i të dy syve në mënyrë adekuate për të krijuar një imazh të vetëm vizual), gabimi refraktiv i pakorrigjuar dhe sytë e thatë. Rritja e kohës para ekranit mund të çojë gjithashtu në tendosje të qafës dhe shpatullave, rrit sasinë e kohës së kaluar duke qëndruar ulur dhe shoqërohet gjithashtu me ngrënie të tepërt, duke rezultuar potencialisht në probleme shëndetësore si mbipesha. "Është vërtet e rëndësishme të jesh i vetëdijshëm për rreziqet e mundshme për sytë dhe shëndetin e përgjithshëm afatshkurtër dhe afatgjatë të fëmijëve. Është thelbësore që pajisjet të përdoren në mënyrë të përshtatshme dhe të inkurajohen aktivitete larg pajisjeve digjitale, të tilla si loja jashtë”, ka thënë autorja kryesore e studimit, Shahina Pardhan, drejtoreshë e Njësisë së Kërkimit të Vizionit dhe Syrit në ARU.