Lajmet e fundit
Prokuroria e Dhomave të Specializuara të Kosovës në Hagë e ka thënë edhe një herë me zë dhe figurë, se në fakt po e akuzon Ushtrinë Çlirimtare të Kosovës për krime, dhe jo disa individë.
Në një përplasje me mbrojtjen e të akuzuarve, rreth një artikulli të "New York Times" për një krim të pretenduar të kryer në Bardh të Madh, e që pretendohet nga gazeta se u bë nga UÇK-ja, prokuroria e ka nxjerrë nga goja fjalinë “krimet e kryera nga UÇK-ja”.
Prokurori Matt Halling e pyeti gazetarin Nuhi Bytyçi, që sot nisi dëshminë në Hagë, nëse kishte parë një artikull të gazetës "New York Times" të asaj kohe, për një krim të pretenduar në Bardh të Madh.
“Nëntë pengje që u morën nga UÇK besohet se janë vrarë pasi forcat serbe rimorën në kontroll Mihjen e rëndësishme të thëngjillit e cila më parë ishte marrë në kontroll nga rebelet shqiptar. Pra ju nuk keni dëgjuar që këta persona nga Bardhi i Madh të jenë vrarë?", pyeti prokuroria.
“Nuk kam dëgjuar as atëherë, as deri më sot nuk kam dëgjuar për këtë”, u përgjigj Bytyçi.
Kur prokurori deshi të insistonte në këtë temë, ndonëse dëshmitari u deklarua se nuk dinte asgjë, reaguan avokatët. Luka Misetiq, që e mbron Hashim Thaçin, tha se prokuroria po sjellë materiale e raste që as nuk janë në aktakuzë.
“A mund të flasim pak, të na thotë prokuroria çfarë relevance kishte kjo sepse po përpiqem ta gjejë në dosjen paragjyqësore ku është përmendur?”, tha ai.
Prokurori Halling, në përgjigjen e tij, tha se çështje kryesore në këtë gjykim është "nëse ka kryer krime UÇK-ja". Kjo ishte deklarata e tij:
“Njoftimi i të akuzuarve nëse ka ndodhur, ka kryer krime UÇK-ja është çështje qendrore në këtë gjykim. Dhe njësoj si rasti i ofensivës së Rahovecit që ka ndodhur shkurtimisht pas ngjarjeve në Bardhin e Madh ekzistojnë shumë pretendime që janë kryer krime nga UÇK-ja në këtë zonë dhe janë kryer në fillimin e periudhës kohore të ngritur në aktakuzë dhe vet dëshmitari e ka vërtetuar dhe ne themi që UÇK-ja ka qenë në gjithë këto zona gjatë gjithë periudhës kohore përmendur në aktakuzë”, tha Halling.
