Prizreni nikoqir i dy turneve të mëdha të basketbollit në shkurt 2026

Qyteti i Prizrenit do të jetë qendra e basketbollit kosovar në muajin shkurt të vitit 2026, pasi Bordi i Federatës së Basketbollit të Kosovës (FBK) ka miratuar zyrtarisht organizimin e dy ngjarjeve të rëndësishme. Në Prizren do të zhvillohen Final 8 i Kupës së Ligës së Parë në konkurrencën e meshkujve si dhe Final 4 i Kupës së Kosovës në konkurrencën e femrave. Këto turne do të mbahen nga 10 deri më 14 shkurt 2026. Ngjarjet do të organizohen në kuadër të programit të FIBA PNRC – Kampi Potencial i Gjyqtarëve Nacional, i cili ka për qëllim zhvillimin dhe avancimin e gjyqtarëve kosovarë. Në këtë kamp do të marrin pjesë nëntë (9) gjyqtarë kandidatë të FIBA-s për licencim në periudhën GOL2027–2029, ndërsa tre (3) prej tyre do të nominohen nga lista e gjyqtarëve të FBK-së. Ky vendim i Bordit të FBK-së hyn në fuqi menjëherë në ditën e miratimit dhe pritet që organizimi i këtyre turneve të sjellë interesim të madh nga dashamirët e basketbollit, duke e kthyer Prizrenin në epiqendër të sportit në Kosovë gjatë kësaj periudhe.