Premiera “Vojçeku” me regji nga Zana Hoxha, sonte në teatrin “Hadi Shehu”

Sonte në teatrin “Hadi Shehu” në Gjakovë jepet premiera e shfaqjes “Vojçeku” me regji nga Zana Hoxha, e bazuar në dramën origjinale të Georg Büchner dhe në adaptimin e Jack Thorne. “Vojçeku” është një portret i fuqishëm dhe thellësisht emocional i vuajtjes njerëzore dhe efektit shkatërrues të padrejtësive shoqërore të ushqyera nga maskuliniteti toksik. Historia e vendosur në Berlinin e vitit 1981 pasqyron një realitet të dhimbshëm dhe brutal ku kufijtë midis dëshpërimit, dashurisë dhe çmendurisë, zhduken. Shfaqja “Vojçeku” nën interpretimin e aktorit Bujar Ahmeti, përpiqet të sigurojë jetesën për gruan e tij Marian e interpretuar nga Vlora Dervishi dhe fëmijën e tyre të vogël, por presioni i varfërisë, mungesa e përkrahjes dhe ekperimentet mjekësore fillojnë ta çojnë drejt shpërbërjes mendore ku vija në mes realitetit dhe imagjinatës zhduket. Kjo vepër e dramaturgjisë botërore është bashkëpunimi i katërt i Teatrit të Gjakovës me regjisoren Zana Hoxha, dhe i pari me artistet nga Anglia, Grace Rumsey dhe Nicoletta Bonanni. Ndërsa, ansamblit për këtë projekt ju shtuan aktorja e njohur Aurita Agushi, aktori i ri Eden Kastrati dhe këngëtari Kreshnik Koshi-Krashi. Reprizat e kësaj shfaqje jepen më 22 shkurt dhe 07 mars 2025, në orën 19:00.