Pogradec: Dyshohet se u godit në kokë me shkop nga burri, e moshuara në gjendje të rëndë

Një ngjarje e rëndë dhune në familje është regjistruar në lagjen nr. 1 të qytetit të Pogradecit, ku një grua ka mbetur e plagosur rëndë.

Siç shkruan A2CNN, fqinjët kanë njoftuar Policinë pasi kanë dëgjuar zhurma që vinin nga banesa e çiftit Shembilko.

Me të mbërritur në vendngjarje, policia ka gjetur 69-vjeçaren në gjendje të rëndë, me plagë serioze, e cila më pas është dërguar fillimisht në spitalin e Pogradecit dhe më pas me helikopter drejt Spitalit të Traumës në Tiranë, transmeton Klankosova.tv.

Nga hetimet e para dyshohet se 78-vjeçari e ka goditur bashkëshorten me një shkop në pjesën e pasme të kokës, duke i shkaktuar plagë të rënda. Ndërkohë, i njëjti është shoqëruar nga Policia, e cila po vijon hetimet për zbardhjen e plotë të rrethanave dhe motivit të kësaj ngjarjeje të rëndë.