Po përgatiten në Turqi, do të përballen sërish më 9 shkurt

Turqia nuk u shfrytëzua vetëm për finalen e Superkupës. Prishtina dhe Drita veç asaj përballje, këto ditë në Antalia, patën edhe ndeshje tjera miqësore, si dhe zhvilluan fazën përgatitore për gjysmë-sezonin e ri të Superligës. Nga atje, për emisionin Sports Show në Klan Kosova të dielën folën Debatik Curri, ndihmës trajner te FC Prishtina dhe Valon Zymberi, drejtor sportiv te Drita. Ky i fundit ka treguar arsyet pse zgjodhën Turqinë.

Valon Zymberi, drejtor sportiv i FC Drita

“Gjithçka ka shkuar në mënyrën më të mirë të mundshme, kushtet klimatike, ambientet, fushat stërvitore janë në nivel shumë të lartë. Trajnerët kanë mundur t’a implementojnë programin për këtë fazë përgatitore”.

  Debatik Curri ka thënë se është i kënaqur me ecurinë e klubit, kurse rezultatet e miqësoreve dhe fitimi i Superkupës ka rritur besimin.

Debatik Curri, ndihmës trajner i FC Prishtina

“Kemi potencial për të luftuar për të dy kupat, si për Kampionatin, po ashtu edhe për garën në kupën e Kosovës. Besoj që me fondin e lojtarëve që kemi edhe mund t'i arrijmë këto".

  Prishtina e Drita përballen sërish në Kupën e Kosovës, saktësisht më 9 shkurt, kur kanë mbetur 16 ekipe në këtë garë.  

KlanKosova.tv