Plisat reagojnë ndaj vendimit të FBK-së: Vendimin e keni të pabazë, ndeshjet luhen për ne, jo për kalkulimet e juaja

Tifogrupi i Prishtinës, “Plisat” ka reaguar ndaj Federatës së Basketbollit të Kosovës, për vendimin që ka ndërmarrë, ku ndalohen tifozët që të udhëtojnë. Ky tifogrup, këtë vendim të FBK-së e ka quajtur të pabazuar dhe diskriminues ndaj gjithë tifogrupeve në vend, transmeton Klankosova.tv. “Plisat reagojnë ashpër ndaj vendimit arbitrar të marrë nga Bordi i Federatës së Basketbollit të Kosovës me dt. 27.10.2022. Cilësojmë si arbitrar për shkak se është marrë një vendim i pabazuar në praktikë, brenda nate, në prag të udhëtimit tonë masovik, dhe jo në fillim të garave, por tek pasi kanë ndodhur disa udhëtime paraprake”, thuhet në reagim. “Vendimi i Bordit përveçse është diskriminues ndaj gjithë tifogrupeve në vend, konsiderojmë se është mëse dashakeq ndaj klubit kryeqytetas. Krejt kjo duke u bazuar në faktet që do ju sjellim mëposhtë”. “Në vendimin e marrë nga Komisioni i Garave, me nr.4/2022 të dt.18.10.2022, nuk shihet ndonjë pengesë për pjesëmarrjen e organizuar të tifozëve të klubit mysafir, klubi mysafir ka drejtuar kërkesën në kohë, e përkundrazi këtu klubi nikoqir nuk ka argumentuar për rrezikshmëri të lartë, andaj edhe është miratuar kërkesa e mysafirëve. Por, ja që, pas 9 ditëve, kësaj radhe ne drejtojmë kërkesën në kohë, klubi nikoqir vullnetarisht ka garantuar bileta, pra e merr përgjegjësinë organizative, dhe kësaj radhe Bordi merr "flamurin" dhe vendimin e tyre e bazon sipas "disa nga ngjarjet e fundit që kanë ndodhur me tifozët në ndeshjet e basketbollit...". Pra shtrohet pyetja, cilave ndeshje?! Sepse me datë 18.10.2022, sipas KG-së, gjithçka ishte në rregull, e ne jemi dëshmitarë që as pas datës 18 nuk kishte ndonjë "ngjarje problematike". Atëherë, ku po bazohet Bordi i FBK-së?” “Ritheksojmë, vendimin e keni të pabazë e qëllimkeq! Ndeshjet luhen për ne, jo për kalkulimet e juaja!”