PFL bën historinë në Spanjë, ndërsa Londra pritet të ndizet me UFC Fight Night

Fabian Edwards kryeson eventin historik të PFL në Madrid, ndërsa Lerone Murphy udhëheq UFC Fight Night në Londër – dy britanikë që ndezin fundjavën më të zjarrtë të MMA në Evropë! Në një kthesë interesante për skenën evropiane të MMA-së, organizata PFL (Professional Fighters League) ka arritur të organizojë eventin e parë madhor të MMA në Spanjë, para se këtë ta bëjë UFC, duke treguar ambicien e saj për zgjerim global dhe rritjen e interesit për sportin në vendin iberik, pavarësisht se UFC ka një yll spanjoll si kampion në Ilia Topuria. Eventi historik në Madrid zhvillohet sot më 20 mars 2026, me Fabian Edwards (vëllai më i vogël i ish kampionit të UFC, Leon Edwards), që kryeson eventin kryesor kundër Costello van Steenis. Kjo përballje jo vetëm që sjell talentë elitarë evropianë në Madrid, por lidhet edhe me një nga familjet më të njohura në MMA. Ndërkohë, UFC rikthehet në Londër, të shtunën më 21 mars 2026 ("Main Card" nga ora 21:00), me britanikun Lerone Murphy që kryeson eventin kryesor në "UFC Fight Night" në Arenën O2 në Londër, duke u përballur me Movsar Evloev, një tjetër luftëtar i pamposhtur në divizionin Featherweight apo kategoria deri <66 kg. Kjo luftë ka rëndësi të madhe për të përcaktuar sfiduesin e ardhshëm për titull kundër kampionit Alexander Volkanovski. Këto dy evente të njëpasnjëshme nënvizojnë një fundjavë vendimtare për MMA-në në Evropë, ku Spanja hyn fuqishëm në skenën globale, ndërsa Mbretëria e Bashkuar vazhdon të jetë një qendër e fortë për sportin e arteve mikse marciale, me dy britanikë që kryesojnë luftërat kryesore në dy eventet më të mëdha evropiane të fundjavës. Si zakonisht, ArtMotion do të transmetojë LIVE eventin e "UFC Fight Night" në Londër, që zhvillohet në Arenën O2, duke filluar me luftërat e "Main Card", që nisin nga ora 21:00 në mbrëmje, këtë të shtunë në kanalin Sport 5.