Përballje gjigantësh në Prizren, Prishtina dhe Peja ngërthejnë 21 tituj kampioni

Gjysmëfinalja e parë e Superkupës së Kosovës në basketboll, ka vënë përballë dy emra të mëdhenj të këtij sporti. Një vend në finale do ta sigurojë fituesi ndërmjet 14 herë kampionëve të Kosovës, Prishtinës dhe Pejës, e cila është shpallur plot 7 herë triumfuese në elitën basketbollistike, raporton Klankosova.tv. Ky duel gjigantësh, fillon në orën 17:00 në palestrën "Sezair Surroi" të qytetit të Lidhjes dhe transmetohet direkt në Sport 4 të platformës gjigante, Art Motion, në komentim të Ulpiana Emrës. Në edicionin e kaluar këto dy skuadra u ballafaquan gjashtë herë, katër në sezonin e rregullt të Prince Caffe Superligës dhe dy herë në Ligën Ballkanike, duke marrë nga tri fitore ndaj njëra-tjetrës, njofton Klankosova.tv. Fituesi i përballjes ndërmjet Sigal Prishtinës dhe Pejës, do ta kërkojë triumfin në Superkupë ndaj skuadrës që rezulton më e mirë në duelin tjetër, ku ndeshen Trepça dhe Golden Eagle Ylli.