Peja reagon pas dënimit të rëndë: Kërkojmë barazi, jemi kundër dhunës në sport

Klubi i basketbollit Peja ka reaguar pas dënimit që i shqiptoi Komisioni i Garave i Federatës së Basketbollit të Kosovës, duke kërkuar barazi. Pejanët u dënuan me dy ndeshje pa praninë e tifozëve dhe pesë mijë euro, pas incidenteve që ndodhën ndaj Golden Eagle Yllit, në duelin e parë gjysmëfinale. Në reagim ata kanë thënë se janë duke punuar kundër dhunës, teksa u zotuan se do të vazhdojnë luftën kundër dhunës në sport. “Fillimisht, e përsërim për mbi të dhjetën herë - që jemi kundër dhunës në sport, kemi punuar maksimalisht kundër dhunës gjatë gjithë sezonit duke qenë skuadra që paguan më shumë se të gjithë për polici dhe sigurim privat, që ndeshja të nis dhe përfundoj në mënyrën e duhur. Fatkeqësisht, disa individa dalin dhe prishin gjithë mundin tonë, por KB Peja zotohet që do vazhdojë luftën ndaj dhunës në sport derisa ky fenomen të zhduket te çdo individ”, thuhet në reagim. “Së dyti, siç jemi kundër dhunës në sport - jemi edhe kundër pabarazisë në sport. Dënimi i shqiptuar për KB Pejën është më i madhi i dy sezoneve të fundit - edhe pse në vendin tonë, në shume raste, është shpërfaqur dhunë tejet më e madhe në palestrat tjera”. “Për një arsye apo tjetrën, është pritur që ky rast të ndodh në Pejë që të kulmojnë dënimet - pavarësisht që raste si kjo, madje edhe shumë më të rënda, të cilat i kemi të dokumentuara me fakte, kanë ndodhur në vendin tonë dhe nuk ka pasuar fare dënimi, ose ka pasuar dënimi shumë më i vogël”. “KB Peja ka investuar jashtëzakonisht shumë dhe vazhdon të investoj për të mirën e basketbollit kosovar - si më përpara edhe tash, kemi qenë gjithmonë akterë kryesor në disa nga spektaklet më të mëdha të basketbollit në vend, por edhe në arenën Europiane, goditje si kjo e fundit, nuk na ndihmojnë neve, por dëmtojnë edhe basketbollin kosovar”. “E përsërisim, dhuna në sport është e patolerueshme, por edhe pabarazia. Kërkojmë barazi në shqiptimin e dënimeve, kërkojmë barazi në ndarjen e drejtësisë, kërkojmë që të gjitha skuadrat basketbollistike në Kosovë të trajtohen me të njëjtën monedhë”. “Ne do vazhdojmë luftën kundër dhunës, me shpresën që ju do vazhdoni luftën kundër pabarazisë”.