Peja kërkon barazimin, Ylli synon gjysmëfinalen në “Karagaçi”

Peja dhe Golden Eagle Ylli do të përballen në ndeshjen e dytë çerekfinale të “Play-off”-it në Superligën e Kosovës në basketboll, në një duel që pritet të sjellë emocione të mëdha. Takimi, i cili fillimisht ishte paraparë të zhvillohej më herët, tashmë do të luhet nga ora 20:30 në palestrën “Karagaçi”, ndërsa transmetohet drejtpërdrejt në Sport 2 të platformës Artmotion. Skuadra nga Theranda e fitoi ndeshjen e parë të zhvilluar më 13 qershor, duke marrë epërsinë në seri dhe tashmë ndodhet vetëm një fitore larg kualifikimit në gjysmëfinale. Megjithatë, Peja nuk pritet të dorëzohet lehtë. E përkrahur nga publiku vendas, skuadra pejane synon të barazojë serinë dhe të mbajë gjallë shpresat për avancim tutje.