Pasi e eliminoi Galatasarayin, AZ Alkmaar fiton edhe ndaj Tottenham

Skuadra modeste e Holandës, AZ Alkmaar, është duke kaluar një kampanjë shumë të mirë në UEFA Europa League. Sidomos në stadiumin e tyre "AFAS", 'Azeta" po shfaq performanca fantastike. Pasi e deklasoi 4-1 gjigantin turk, Galatasaray, ekipi nga distrikti holandez i Zaan, e mundi sonte edhe Tottenhamin anglez, me rezultat 1-0, raporton Klankosova.tv. Ky triumf i afron ata edhe më shumë drejt çerekfinales në kompeticionin e dytë për nga rëndësia në Evropë. Suedezi i londinezëve, Lucas Bergvall, shënoi në portën e 'gabuar', për t'i dhënë avantazhin AZ Alkmaarit, pas aktit të parë të zhvilluar. Ndeshja e kthimit do të luhet të enjten e ardhshme në "Tottenham Hotspur Stadium", ku edhe do të vuloset çerekfinalisti nga ky duel. Me rezultat të njejtë, holandezët e kishin mundur gjatë fazës së parë të këtij kompeticioni, edhe një ekip të madh evropian, Romën, njofton Klankosova.tv. Ndërkaq nga "AFAS' kokë ulur ishte larguar edhe Jose Mourinho me futbollistët e tij, kur AZ e mundi 3-1 Fenerbahcen.