Pas turneut në Poloni, Itali, Maltë e Slloveni, “The Best European Show” shfaqet në Prishtinë

Pas turneut në Poloni, Itali, Maltë e Slloveni, “The Best European Show” është shfaqur në Prishtinë. Kjo shfaqje është një komedi satirike për një juri eklektike evropiane që duhet të përcaktojë fituesit e festivalit të fundit teatror duke i hapur përfundimisht rrugën digjitalizimit të teatrit. “The Best European Show” me tekst të Marko Bratush dhe Haris Pashoviq, e me regji të Haris Pashoviq është realizuar në bashkëpunim mes Teatrit Kombëtar të Kosovës, Teatrit Due nga Parma e Italisë, Teatri Kombëtar Slloven të Nova Goricës, Teatrit Opole nga Polonia dhe Teatrit të Maltës. Në Sallën e Kuqe të Pallatit të Rinisë në këtë shfaqje luajtën: Armend Smajli, May-Linda Kosumovic, Davide Gagliardini, Ana Facchini, Gianni Selvaggi, Philip Leone Ganado, Felix Römer, Weronika Kozakowska, Blazej Stencel, Jammeh Diangana, Paola de Crescenzo dhe Lumnije Sopi. Të pranishëm ndër shumë artadashës, ishin zëvendëskryeminstrja dhe ministrja e Punëve të Jashtme, Donika Gërvalla, ministrja e Drejtësisë, Albulena Haxhiu, deputetë e ambasadorë. Publiku i interesuar reprizrën e shfaqjes mund ta shohin edhe sonte nga ora 20:00, Salla e Kuqe (Pallati i Rinisë).