Paolo Maldini drejt kreut të futbollit italian, mediat në Itali zbulojnë mbështetje të gjerë për legjendën kuqezi

Emri i Paolo Maldini po qarkullon me forcë në Itali si kandidati më serioz për të marrë drejtimin e FIGC. Sipas raportimeve të mediave të njohura italiane, ish-kapiteni legjendar i AC Milan po fiton gjithnjë e më shumë mbështetje nga figura të rëndësishme të futbollit dhe komuniteti sportiv, raporton KlanKosova.tv. Burimet pranë federatës bëjnë të ditur se ideja për ta vendosur Maldinin në krye të futbollit italian shihet si një hap i madh drejt reformimit dhe rikthimit të besimit te institucionet. Figura e tij e pastër, përvoja si drejtues dhe respekti që gëzon në arenën ndërkombëtare e bëjnë atë një kandidat ideal për këtë rol. Mediat italiane theksojnë se shumë ish-lojtarë, trajnerë dhe drejtues klubesh e shohin Maldinin si njeriun e duhur për të udhëhequr një epokë të re në futbollin italian, pas kritikave të shumta ndaj drejtimit aktual. Megjithatë, deri tani nuk ka një konfirmim zyrtar nga vetë Maldini, ndërsa pritet që në ditët në vijim të ketë zhvillime të reja rreth këtij kandidimi që ka ndezur debat të madh në Itali.