Lajmet e fundit
Izet Tahiri, drejtor sportiv, KB Trepça[/caption]
Drejtori mitrovicas e pranon se pas përballjes me një sfidë shëndetësore të kapitenit, Drilon Hajrizi, medoemos se do të vërehet mungesa e tij në këtë turne.
"Drila është njëri ndër basketbollistet më të mirë qe ka pas Kosova ndonjëherë dhe normal se do vërehet mungesa e tië, por njëherë është e rëndësishme që e ka kaluar me sukses atë sfidë shëndetësore që e kishte, shpresojme së shpejti do i bashkangjitet skuadres qe te na ndihmojë drejt sfidave qe na presin" thotë Izeti.
Një prej rivalëve kryesorë të Trepçës në vitet e fundit, është Golden Eagle Ylli. Këta të fundit pikërisht ndaj mitrovicasëve, në vitin 2022 u shpallën kampionë, sikurse që në edicionin e fundit, Trepça e fitoi titullin në finale ndaj këtij kundërshtari.
Sikur homologu i tij nga Mitrovica, Izet Tahiri, edhe drejtori sportiv i suharekasëve, Egzon Fetiu, nuk veçon ndonjë skuadër që mund të jetë kundërshtar më i fortë në Prizren, pasi thotë se i respektojnë të gjitha.
"Në çdo kompeticion ku garojmë, synimet tona janë për të fituar, natyrisht që edhe Superkupës do t'i qasemi me këtë mentalitet. Ne jemi në fazën e konsolidimit të skuadrës dhe lojës tonë, e kemi fokusin vetëm tek vetja", shprehet Fetiu.
"Nuk do të doja të specifikoja ndonjë emër se cili mund të jetë kundërshtar më i fortë apo më i lehtë, pasi të gjitha ekipet e Superligës kanë ndërtuar skuadrat e tyre me pretendimin për të qenë të forta. Nuk është se ka dallime të mëdhaja, siç është dëshmuar edhe në te kaluarën, pasi në kampionatin tonë secili mund ta mposht secilin. Ne nuk shikojmë se kush mund të jetë më i fortë, ne fokusohemi që ne te paraqitemi sa më fortë", deklarohet Fetiu për Klankosova.tv.
[caption id="attachment_2372265" align="alignnone" width="158"]
Egzon Fetiu, drejtor sportiv, KB Ylli[/caption]
Se a është gati nënkampioni aktual i Kosovës për edicionin e ri dhe çfarë mund të pritet nga Ylli, Fetiu përgjigjet si gjithmonë me besimin e plotë te sukseset.
"Skuadra është duke u konsoliduar dhe përgaditur me tempon graduale të nevojshme, së fundmi trajneri veç e ka në dispozicion përbërjen e plotë, me të cilët po stërvitet dhe nga dita në ditë do të jemi më të komponuar e më të harmonizuar si ekip.
Objektivat e Golden Eagle Yllit janë gjithmonë të njejta, ne çdo herë luftojmë për trofe, në të gjtha garat ku bëjmë pjesë sepse tashmë kjo është në ADN-në tonë", thotë drejtori sportiv i dy herë kampionëve të Kosovës.
E si çdo vit, edhe për edicionin e ri, në një mënyrë ose tjetrën të gjithë njërin sy e orientojnë në kryeqytet, për ta kuptuar se si do të qaset Prishtina në garë.
Klubi më i trofeshëm i Republikës, sivjet ka gërshetuar gjeneratat, andaj sipas drejtuesit sportiv të klubit, kjo do të jap rezultatet e veta.
Blerand Stavileci madje shkon përtej organizimit në kryeqytet, duke thënë se Prishtina ka obligim edhe t'u jap shembull klubeve tjera kosovare.
"Si klubi më i trofeshëm, Prishtina përveç titujve të shumtë që posedon në vitrinën e saj të pasur, nacionale dhe internacionale, ka përgjegjësinë edhe për të shërbyer si model për të gjitha klubet dhe organizatat sportive në Kosovë. Këtë vit kemi bëre miksin më të mirë të gjakut rinor dhe përvojës garuese, të cilën ia kemi besuar njërit prej njohësve më të mirë të basketbollit që ka ardhur në Kosovë, Murat Bilge", deklaron Stavileci për Klankosova.tv.
[caption id="attachment_2372266" align="alignnone" width="197"]
Blerand Stavileci, kryetar, KB Prishtina[/caption]
Prishtina koncentrimin nuk e ka vetëm në të tashmën, pasi kryetari i kësaj skuadre thotë se planet e klubit nga kryeqyteti janë afatgjate.
" Sivjet tërësisht do të jemi të përqëndruar në një model, sa zhvillimor aq edhe garues, për sa i takon synimeve sezonale, por tashmë objektivat tona janë strategjike dhe jo afatshkurtëra.
Duke pasur gjysmën e reprezentacionit të Kosovës U-20 brenda kontigjentit të skuadrës tonë, besojmë se pas disa vitesh, këta do të jenë baza e ekipit kryesor përfaqësues të Kosovës, sepse është e pafalshme gjendja në të cilën është sot reprezentacioni senior i shtetit.
"Kemi qenë dhe jemi të parët në të gjitha aspektet, sa i takon basketbollit, sukseseve, menaxhimit dhe marketingut sportiv, do të jemi të parët edhe në këtë drejtim, pra të modelit të ri zhvillimor" shprehet pa modesti kryetari i Prishtinës.
Madje Stavilecit nuk është duke i bërë përshtypje ajo që deri tani kanë bërë klubet tjera, që i cilëson shumë larg vizionit të Prishtinës.
"Të gjitha skuadrat rivale i shohim në të njejtin nivel, me dallime të vogla. Por asnjëren nuk e shikojmë se po krijon diçka si Prishtina, e urojmë që këtë ta bëjnë sa më shpejtë, nese duam ardhmeri të ndritshme per gjeneratat e reja" përfundon Stavileci prononcimine tij për Klankosova.tv.
Por si Prishtina, Trepça apo Golden Eagle Ylli, njërin prej kundështarve kryesor në çdo garë, padyshim se e kanë Pejën.
Menaxheri mediatik i këtij klubi, Ardit Lipa, insiston se KB Peja gjithmonë synon të fitoj trofe dhe asnjëherë në asnjë kompeticion nuk futet me ndonjë synim tjetër, pos rikthimit të trofeut në Karagaç, raporton Klankosova.tv.
"Duke pasur parasysh numrin e madh të transferimeve në çdo skuadër, Superkupa gjithmonë është një enigmë sa i përket se kush është favorit dhe kush jo, prandaj sa i përket kundërshtarit më të fortë - mund ta cekim vetëm kundërshtarin e parë, që për ne në çerekfinale është Proton Cable Prizreni. Nëse kalohet sfida e parë, atëherë do mendojmë për tjerat, por momentalisht i gjithë fokusi është te ndeshja me Prizrenin", shprehet Lipa.
[caption id="attachment_2372271" align="alignnone" width="129"]
Ardit Lipa, menaxher mediatik, KB Peja[/caption]
Pejani i lidhur me krejt qenien e tij me klubin e qytetit, bën me dije për Klankosova.tv se trajneri izraelit, Rami Hadar, është shumë i lumtur me kontigjentin e ndërtuar për të, para fillimit të edicionit të ri, duke filluar nga Superkupa e Kosovës.
"KB Peja ka 5 lojtarë të huaj dhe një grup kualitativ të vendorëve, andaj do vazhdohet dhe do punohet që sukseset të arrihen me këtë grup, andaj të paktën momentalisht nuk do ketë ndryshime. Se si rrjedhë sezoni asnjëherë nuk i dihet, por shpresojmë që të vazhdojmë me grupin e njëjtë deri në fund dhe të mos na përcjellin më lëndimet, ashtu si sezonin e kaluar" përfundon Lipa.
Jo vetëm se janë bashkorganizator me Federatën e Basketbollit të Kosovës në turneun e Superkupës, por një prej skuadrave që ka zgjuar kërshërinë e gjithë komunitetit basketbollistik e basketbolldashës, padyshim që është ajo e Bashkimit.
Transferimet që ekipi prizrenas i bëri gjatë kësaj vere, lënë të kuptohet se mund t'u dalë një lloj "kali i Trojës" të gjitha skuadrave pretendente për titull.
Bile objektivat madhore nuk i fshehin as në kryesinë e kësaj skuadre, njofton Klankosova.tv.
"Këtë sezon kemi hyrë me ambicie dhe synime të qarta që të jemi ndër pretendentët kryesorë për të gjitha titujt", thotë Qëndrim Biraj, drejtor sportiv te Bashkimi.
[caption id="attachment_2372272" align="alignnone" width="206"]
Qëndrim Biraj, drejtor sportiv, KB Bashkimi[/caption]
"Po e them këtë pasi këtë edicion e kemi ngritur mjaftueshëm nivelin e organizimit në përgjithësi, përtej aspektit të strukturës organizative me persona adekuatë në pozitat e duhura, edhe brenda ekipit po besoj që jemi përforcuar me lojtarë cilësor, të cilët nën udhëheqjen e stafit të trajnerëve, do të arrijnë objektivat e lartcekura" shprehet ish-kapiteni i Bashkimit.
"Këtë edicion fazën përgaditore, për dallim nga vitet e kaluara, e kemi filluar me kohë dhe poashtu që nga dita e parë kemi qenë me përbërje të plotë si ekip. Ky fakt besoj që do jetë një ndër përparsitë tona si skuadër në garën e Superkupës, duke e shtuar këtu edhe terrenin vendas dhe poashtu pa harruar përparësinë tonë më të madhen, tifozët "Arpagjikët". Me gjithë këta faktorë, besoj që minimalisht do jemi në finale e maksimalisht të jemi fitues" thotë drejtori sportiv, pa u kursyer nga objektivat madhore.
Edhe rivalët e Bashkimit në Prizren, besojnë se me mbështetjen e publikut të qytetit të Lidhjes, do të shfaqin basketboll më të mirë e do të jenë me motiv shtesë për t'i mposhtur kundërsharët.
Trajneri i Proton Cable Prizrenit, Arbnor Rifati, do të përballet në çerekfinale të Superkupës me Pejën, e që për të nuk është diçka e pamundur fitorja.
[caption id="attachment_2372273" align="alignnone" width="199"]
Arbnor Rifati, trajner i Prizrenit[/caption]
"Ne Pejën kemi potencial ta mposhtim edhe në “Karagaç”. E sigurisht se terreni vendas, shikuesit e adhuruesit e Prizrenit do na e lehtësojnë objektivin tonë. Mendoj se nuk është befasi ta mposhtim Pejën, pasi atë e kam bërë shumë herë. Ne e kemi në vitrinë trofeun e Superkupës, të fituar në vitin 2022-23. Edhe tani do të japim gjithçka për ta prezentuar ekipin në mënyrën më të mirë të mundshme. Do të jetë goxha nxehtë" thotë "The Special One".
Ndonëse ende nuk janë kompletuar tërësisht, kjo nuk i pengon gjakovarët e Vëllaznimit që të synojnë ta mposhtin Prishtinën në çerekfinalen e Superkupës.
Kryetari i Kuq e Zinjëve, Ideal Bakia, thotë për Klankosova.tv. se skuadra tash e gati një muaj është duke u përgaditur për këtë turne.
"Ne kemi filluar përgaditjet nga 12 Gushti, për të qenë maksimalisht gati për ndshjen e parë të Superkupes. Do të shkojmë me qëllim që të tentojmë fitoren ndaj Prishtinës. Por të gjithë e dimë se kemi perballë ekipin më të trofeshëm në Kosovë dhe ndeshja nuk do të jetë aspak e lehtë", shprehet ai.
[caption id="attachment_2372274" align="alignnone" width="169"]
Ideal Bakija, kryetar i KB Vëllaznimi[/caption]
Bakija që thotë se po presin të përforcohen edhe me një apo dy lojtarë, ka edhe një mesazh për tifozët e Vëllaznimit, që ai i quan të mrekullueshëm.
"Unë ju bëj apel që të vazhdojnë me oranizimin fenomenal dhe korrekt që i ka karekerizuar ata gjithmonë, duke qenë shembul i nje tifozërie fer dhe korrekte, por asnjëherë pa munguar energjia që e shtyen skuadrën tonë për të performuar më mirë".
Për herë të parë në elitën basketbollistike do të garojë edhe KB Bora. Kryeqytetasit janë edhe ndër klubet e para sivjet që nisën konsolidimin e skuadrës së tyre për ediconin 2024/25.
"Përgatitjet tona kanë nisur me kohë dhe jemi të përkushtuar në transferimin e lojtarëve të cilët jo vetëm që kanë talent, por edhe ndajnë vlerat e klubit tonë. Objektivi ynë kryesor është të ndërtojmë një ekip konkurrues që luan me pasion dhe disiplinë. Megjithëse synimet tona janë të larta në periudhë afatgjate, ne do të përqendrohemi në çdo ndeshje duke dhënë maksimumin dhe duke u rritur hap pas hapi. Ne duam të jemi një skuadër që respekton kundërshtarët dhe fiton respektin e tifozëve me performancat në fushë", deklaroi për Klankosova.tv drejtori gjeneral i KB Borës, Elvedin Plakiq.
Megjithatë për ekipin e promovuar sivjet në Superligë, shorti i çerekfinaleve të Superkupës së Kosovës, rezultoi shumë i vështirë. Por Plakiq thotë se pavarësisht se kundërshtari është kampioni aktual, ndaj Trepçës nuk do të shfaqen inferiorë.
[caption id="attachment_2372275" align="alignnone" width="188"]
Elvedin Plakiq, drejtor gjeneral, KB Bora[/caption]
"Ne e dimë që është një ndeshje shumë e vështirë, por do të hyjmë në të me qëndrimin e duhur, duke luajtur me zemër dhe përkushtim. Nga Bora, tifozët mund të presin një përpjekje maksimale, disiplinë dhe bashkëpunim brenda fushës. Ne jemi të vetëdijshëm për forcën e kundërshtarëve, por besojmë në grupin tonë dhe në përgatitjet që kemi bërë deri tani. Pavarësisht rezultatit, qëllimi ynë është të japim më të mirën dhe të vazhdojmë të rritemi si ekip" përfundon prononcimin e tij drejtori i Borës.
Superkupa e Kosovës fillon të shtunën më 7 shtator, me dy ndeshje. Në ora 17:00 përballet Trepça me Borën, kurse në ora 20:00 ndeshen Prishtina dhe Vëllaznimi, raporton Klankosova.tv.
E diela fillon me ndeshjen ndërmjet Pejës dhe Prizrenit (17:00), për t'u mbyllur çerekfinalet me derbin 04, ku Ylli sfidon nikoqirët, Bashkimin. Ky duel fillon në orën 20:00.
