Osmani takon ndihmës sekretaren e Përgjithshme të Kombeve të Bashkuara

Presidentja Vjosa Osmani e ka takuar sot ndihmës sekretaren e Përgjithshme të Kombeve të Bashkuara dhe ndihmës administratoren e UNDP-së Mirjana Spoljaric – Egger. Osmani e ka falënderuar Spoljaric – Egger-in për mbështjejen që Kosova e ka marrë nga kjo organizatë që prej vitit 1999. “Sipas Presidentes Osmani, me këtë mbështetje UNDP-ja ka kontribuar në rritjen e perspektivës së zhvillimit në vend dhe në këtë kontekst ka përmendur se pandemia ka goditur shumë biznese të udhëhequra nga gratë”, thuhet në njoftimin e Zyrës së Presidencës. “Ajo ka theksuar nevojën e përfshirjes më të madhe të grave në tregun e punës për të realizuar potencialin e plotë për zhvillim ekonomik të një vendi. Presidentja Osmani ka theksuar se Kosova beson në vlerat e OKB-së dhe vizionin e saj për zhvillim të qëndrueshëm”. Në këtë takim u fol edhe për zhvillimin e qëndrueshëm dhe u vu theksi te investimi në kapitalin njerëzor. “Sipas saj, objektivat e Zhvillimit të Qëndrueshëm përfaqësojnë një udhërrëfyes për një mirëqenie më të mirë. Të dy bashkëbisedueset kanë folur edhe për transformimin digjital, tranzicionin në energjinë e gjelbër dhe financimin inovativ”. “Në këtë drejtim, Presidentja Osmani theksoi nevojën për financim të konsiderueshëm për të realizuar tranzicionin e drejtë energjetik në Kosovë, i cili ka në konsideratë shtimin e kapaciteteve prodhuese nga burimet e ripërtëritshme të energjisë dhe koston e përballueshme të energjisë për qytetarët".