Nesër finalizohet marrëveshja për krijimin e ligës së përbashkët Kosovë – Shqipëri

Nesër në Tiranë do të finalizohet marrëveshja në mes të Federatës së Basketbollit të Kosovës dhe asaj të Shqipërisë, për krijimin e një lige të përbashkët në këtë sport. Kjo marrëveshje do të nënshkruhet nga krerët e dy federatave, Arben Fetahut të Kosovës, dhe Avni Ponarit të FBSH-së, transmeton Klan Kosova. I pranishëm në arritjen e kësaj marrëveshje do të jetë edhe Kryeministri i Shqipërisë, Edi Rama. “Pas një pune të gjatë dhe intensive mes dy federatave, më në fund po jetësohet ëndrra për zhvillimin e veprimtarive basketbollistike të trevave shqiptare”, thuhet në njoftimin e FBK-së. “Në Ligën Unike do të marrin pjesë tetë skuadra, katër më të mirat nga Kosova dhe katër më të mirat nga Shqipëria”. “Liga Unike pritet të fillojë së shpejti, gjatë këtij edicioni sportiv, dhe parashikohet të jetë shumë interesante, duke zgjuar interesimin e tifozëve shqiptarë, kurse në parket pritet të ketë shumë rivalitet mes skuadrave që do të përfshihen në këtë garë”. “Ky projekt është përkrahur nga komuniteti i basktebollit në Shqipëri dhe Kosovë, duke e konsideruar atë si një event të shumëpritur dhe gjithashtu është përkrahur edhe nga FIBA Evropa”.