"Negotiating Peace" e Jeton Nezirajt shfaqet në Festivalin e Teatrit në Oslo

"Negotiating Peace" e dramaturgut Jeton Neziraj, është shfaqja që jepet sot dhe nesër ne Teatrin Black Box Teatre, në kuadër të Festivalit Ndërkombëtar të Teatrit, në Oslo të Norvegjisë. Me temën  “Rrënjët dhe Rikthimet: Teatri në Udhëkryqin e Perandorisë dhe Identitetit”, edicionin e 13-të të këtij festivali e karakterizojnë shfaqjet me pyetjet që lidhen me identitetin, lirinë, demokracinë dhe traumat kolektive e individuale. Këtë vit, festivali do të jetë nikoçir i artistëve e shfaqjeve nga Ukraina, Estonia, Bjellorusia, Kirgistani, Taxhikistani dhe Kosova, vende këto që kanë qenë dhe në disa raste ende janë nën regjime autoritare. Paralelisht, festivali do të ketë një program tematik me ligjërata dhe diskutime, ku do të organizohet edhe një bisedë ndërmjet dramaturgut Jeton Neziraj dhe kritikes së teatrit Natasha Tripneyt, një lexim skenik i dramës “Citycide” të antropologes kosovare Eli Krasniqi, që përcillet me bisedë me autoren si dhe një ndejë e quajtur ‘Mbrëmja e Kosovës”. Në këtë edicion të festivalit, krahas këtyre ngjarjeve, do të prezantohet edhe produksioni norvegjez i dramës “The Handke Project” i Jeton Nezirajt, me regji të Blerta Nezirajt, një produksion ky i Akademisë Norvegjeze të Teatrit në bashkëpunim me Qendrën Multimedia.