Lajmet e fundit
Kanceri te fëmijët dhe adoleshentët përbën ndërmjet 0,8 dhe 1,1 përqind të të gjitha sëmundjeve malinje të sapo diagnostikuara në Serbi, njoftoi sot Instituti i Shëndetit Publik të Serbisë “Dr Milan Jovanović Batut”, në prag të Ditës Ndërkombëtare të Kancerit të Fëmijëve, raporton N1info, transmeton Klan Kosova.
Në Serbi thuhet se mesatarisht çdo vit regjistrohen rreth 370 fëmijë me një lloj sëmundjeje malinje.
Dita Ndërkombëtare e Kancerit të Fëmijëve është themeluar nga Konfederata Ndërkombëtare e Shoqatave të Prindërve të Fëmijëve me Kancer dhe shënohet më 15 shkurt në më shumë se 100 vende të botës.
Kanceri i fëmijërisë përbën 0,4 deri në 4 përqind të të gjitha sëmundjeve malinje në popullatën e përgjithshme në mbarë botën dhe është shkaku kryesor i vdekjeve te fëmijët dhe adoleshentët deri në moshën 19 vjeç, sipas Institutit.
Vlerësimet nga Agjencia Ndërkombëtare për Kërkime mbi Kancerin nga viti 2022 tregojnë se më shumë se 275 mijë fëmijë kanë një formë të sëmundjes malinje.
Instituti thekson se, sipas të njëjtave përllogaritje, deri në vitin 2050 do të regjistrohen 285 mijë raste të reja të sëmundjeve malinje te fëmijët, ndërsa 110 mijë fëmijë do të vdesin nga kanceri nëse nuk bëhen investime shtesë për përmirësimin e qashes në shërbimet shëndetësore apo trajtimin e kancerit te fëmijët.
Bazuar në organizimin dhe funksionimin aktual të sistemit të kujdesit shëndetësor në fushën e onkologjisë pediatrike në nivel global, pothuajse 45 përqind e fëmijëve nuk do të diagnostikohen. Ndërhyrjet gjithëpërfshirëse mund të shmangin dhjetëra mijëra vdekje nga kanceri në fëmijëri deri në vitin 2050.
Në Serbi, pothuajse dy të tretat e fëmijëve të sapo infektuar janë nën 15 vjeç. Sëmundjet malinje më të zakonshme në fëmijëri janë leucemia, tumoret e trurit, tumoret e sistemit të kockave dhe kyçeve dhe limfomat, shtohet në deklaratë.
