Në Prishtinë shfaqen filma historikë në nderë të 80-vjetorit të çlirimit të Shqipërisë

Në kinemanë ABC, këtu në Prishtinë po shfaqen dy filma, prodhime të Kinostudios ''Shqipëria e re''. Këta filma janë historikë dhe janë krijuar si dedikim i 80 vjetorit të çlirimit të Shqipërisë, transmeton klankosova.tv. Me fillim nga ora 18:00 filloi shfaqja e filmit ''Përrallë nga e kaluara'', i cili shtjellon tematikën e kulturës shqiptare, sfidat e grave në kohën e sistemit patriarkal. I tëri është një komedi me tendenca ironie për kohën kur njerëzit nuk e kishin fatin e tyre në dorë. E nga ora 20:00 do të transmetohet filmi ''Gjeneral Gramafoni'', i cili trajton temën e luftës dhe rezistencës së shqiptarëve gjatë kohës së Luftës së Dytë Botërore. Të pranishëm në këtë ngjarje ishin figura të njohura të politikës vendore, Liburn Aliu, ministër i mjedisit, planifikimit hapësinor dhe infrastrukturës, kryetari i Aleancës për Ardhmërinë e Kosovës, Ramush Haradinaj, përfaqësues të ambasadave në Kosovë, si ambasadori italian Antonello De Riu dhe ambasadori turk, Sabri Tunç Angili. Ndërkaq, të enjtën duke filluar nga ora 18:00 do të shfaqen edhe dy filma të tjerë, në Kinemanë ABC, ''Lulekuqet mbi mure'' dhe ''Radiostacioni''.