“Ne jemi një", Xhaka, Hajdari dhe Avdullahu vijnë me mesazh pas vërshëllimave të tifozëve

Kosova e mbylli ciklin e kualifikueseve me barazim 1-1 ndaj Zvicrës në Prishtinë, në një ndeshje të zhvilluar nën reshje të dendura shiu të martën mbrëma. Përfaqësuesja dardane e përfundoi fazën kualifikuese në mënyrë historike, duke zënë vendin e dytë dhe duke siguruar pjesëmarrjen në “play-off”. Megjithatë, në qendër të vëmendjes pas ndeshjes u vendos Granit Xhaka. Kapiteni i Zvicrës, me prejardhje shqiptare, u vërshëllye vazhdimisht nga një pjesë e tifozëve kosovarë sa herë që prekte topin. Ky reagim erdhi si pasojë e deklaratave të tij të fundit në drejtim të Albian Hajdarit dhe Leon Avdullahut, dy futbollistëve që zgjodhën të lënë Zvicrën për të përfaqësuar Kosovën. Por pas ndeshjes, situata mori një kthesë pozitive. Ishte pikërisht Albian Hajdari ai që doli në mbrojtje të Xhakës, duke publikuar në rrjetet sociale një fotografi së bashku me mesfushorin e Zvicrës dhe Leon Avdullahun, shoqëruar me mbishkrimin: “Ne jemi një.” Postimi u rishpërnda edhe nga Avdullahu dhe vetë Xhaka, duke dhënë një mesazh qartësisht të fortë për unitet dhe respekt të ndërsjellë, pavarësisht zhurmës që krijohet jashtë fushe.