Në Itali gjenden pikturat e vjedhura të Van Goghut

Policia italiane ka gjetur dy piktura të famshme të piktorit Van Gogh që ishin vjedhur nga muzeu i Amsterdamit në vitin 2002. Nga muzeu i piktorit Van Gogh kanë deklaruar se pikturat janë zbuluar pas një hetimi të gjatë nga prokurorët italianë, transmeton Klan Kosova. Pikturat ishin marrë nga hajdutët që kishin përdorur një shkallë për tu futur në muze. Policia italiane ka bërë të ditur se pikturat ishin në mesin e aseteve me vlerë prej miliona eurosh të sekuestruara nga grupi Camorra. Vjedhja e dy veprave, të përshkruara si tepër të çmuara kishte ngritur kritika për sigurinë në muzeun më  të madh në botë të artit. Asnjëra nga veprat nuk ishte e siguruar në atë kohë dhe të dyja i ishin huazuar muzeut të Van Goghut nga Qeveria holandeze. Muzeu përmes një deklarate ka bërë të ditur se deri tani nuk është e qartë se kur punimet do të kthehen në Amsterdam, por kanë bërë të ditur se pikturat janë në gjendje të mirë.