Ndeshje spektakolare në “Fadil Vokrri”, Ballkani fiton dramën me penallti ndaj Prishtinës

Ballkani ka arritur të kualifikohet në çerekfinale të kupës së Kosovës, pas një ndeshje spektakolare ndaj Prishtinës në kryeqytet. Takimi nisi mirë për Prishtinën të cilët realizuan qysh në minutën e parë me anë të Philippe Boueye. Me rezultatin minimal, përfundoi pjesa e parë. Pjesa e dytë pati shumë dinamikë e gola. Prishtina dyfishoi rezultatin me anë të Marko Ilievskit, që realizoi në minutën e 50-të. Reagimi i Ballkanit në çerekun e fundit të lojës ishte i shkëlqyeshëm. Ata fillimisht ngushtuan epërsinë në minutën 77-të, fal një autogoli nga Ardian Limani. Derisa në minutën e 88-të, Ballkani fitoi një penallti, të cilën e konkretizoi në gol, Almir Kryeziu. Ndeshja shkoi në vazhdime dhe drama nuk u ndal aty. 8 minuta brenda vazhdimeve, përmbysi rezultatin goli i Ivica Batarelos, për t’i dhënë avantazhin Ballkanit. Mirëpo Prishtina barazoi menjëherë, për ta dërguar këtë super ndeshje në ekzekutimin e penalltive. Drama vazhdoi edhe në penallti, ku pas raundit të 15-të, të ekzekutimeve u përcaktua si fituese Ballkani me rezultatin 11-10.