Ndalohet një person i dyshuar për vdekjen e ukrainases në Kosovë

Një person i dyshuar është arrestuar në lidhje me rastin e vdekjes së 23-vjeçares nga Ukraina, Olena Kozii. Ai është ndaluar për 48 orë dhe ngarkohet për vepren penale "Mosevitim i rrezikut". Lidhur me rastin detaje ka dhënë kryeprokurori i Ferizajt Shukri Jashari. Jashari tha për Klankosova.tv se i dyshuari e ka pranuar se ka qenë bashkë me viktimën gjatë ditës kritike. "Po, është ndaluar një person i dyshuar. Ai dyshohet se ka kryer veprën penale "Mosevitim i rrezikut". Personi është ndaluar për 48 orë", tha Jashari për Klankosova.tv "Personi në fjalë e ka pranuar se gjatë gjithë ditës ka qenë bashkë me viktimën. Pra, ai dyshohet se e ka lënë në autostradë viktimën", tha ai. Kreu i organit të akuzës në Ferizaj theksoi se 23-vjeçarja e ka humbur jetën si pasojë e një aksidenti. "Ende nuk kemi arritur që ta identifikojmë personin që e ka shkaktuar aksidentin. Kjo për shkak të mungesës së kamerave në autostradë. Kjo pjesë i takon nivelit tjetër të përgjegjësisë. Pra, viktima ishte goditur nga një makinë e cila ishte në lëvizje", theksoi Shukri Jashari për Klankosova.tv "Brenda afatit ligjor do të bëhet kërkesa për caktimin e masës së paraburgimit", tha ai. Raportohet se deri tek rasti tragjik erdhi pasi tani e ndjera Olena Kozii, kishte zbritur në autostradë nga vetura e të dyshuarit pas një zënke që kishin mes vete./Klankosova.tv