Muzeu italian mund të zbulojë misterin e flokëve të Leonardo da Vinçit

Një muze italian thotë se ka në plan të kryejë testet e ADN-së në një bllok flokësh që beson se mund të kenë qenë të artistit të rilindjes, Leonardo da Vinçi. Megjithatë, disa ekspertë kanë hedhur dyshime mbi këtë, duke thënë se flokët me siguri nuk i përkasin mjeshtrit italian, ndërsa testimi i besueshëm i ADN-së mund të jetë i pamundur. Skepticizmi i ekspertëve lidhet me atë se Leonardo da Vinçit nuk i dihet nëna, nuk ka lanë asnjë trashëgimtar si dhe varri i tij është shkatërruar njëherë, transmeton Klan Kosova. Alessandro Vezzosi, drejtori i muzeut “Leonardo da Vinçi” tha se filli i flokëve u mblodh nga një komision mbretëror që ishte angazhuar më 1863 për të gjetur ndonjë gjë të da Vinçit. Testimi duhet gjithashtu të jetë në gjendje të provojë nëse mbetjet e identifikuara në Francë në vitin 1863 me të vërtetë i përkisnin da Vinçit. "Ajo që është e rëndësishme është të mos e marrim për të vërtetë një rezultat përpara se të përfundojë testimi shkencor", tha Vezzosi. Da Vinçi vdiq në maj 1519 dhe u varros në Chateau d'Ambroise pranë qytetit francez të Tours. Kalaja u dëmtua rëndë pas Revolucionit Francez të vitit 1789 dhe shumë varre u shkatërruan, duke përfshirë atë të Leonardo, shkruan Reuters, transmeton Klan Kosova.

klankosova.tv