Muriqi për ndeshjen kundër Rumanisë: Jemi krenarë me vendimin që kemi marrë

Kosova sonte i zhvillon përgatitjet e fundit para ndeshjes me Lituaninë. Përballja e nesërme në "Fadil Vokrri" do të jetë e fundit për "Dardanët", në këtë edicion të Ligës së Kombeve. Por, temë kryesore e konferencës për media të mbajtur sot nga trajneri Franco Foda e sulmuesi Vedat Muriqi, ishte ndeshja e së premtes me Rumaninë, e cila u ndërpre për shkak të thirrje raciste nga tifozët rumunë. Në këtë konferencë, Muriqi u shpreh se ndihet krenar me vendimin që morën në Bukuresht për ta lëshuar fushën pas ofendimeve nga tifozët vendas. “Jemi krenarë pasi kemi marrë vendimin e duhur. Duhet të fokusohemi te ndeshja e radhës dhe shpresojmë ta mbyllim këtë cikël të Ligës së Kombeve me fitore”, ka thënë ai. Kombëtarja e Kosovës, është ende në pritje të vendimit të UEFA-s për ndeshjen e së premtes ndaj Rumanisë.