Milan gati të dëgjojë ofertat për Rafael Leao, Manchester United në garë

Sipas raportimeve të La Gazzetta dello Sport, AC Milan është i gatshëm të dëgjojë oferta për sulmuesin Rafael Leao gjatë merkatos së verës, në një moment kur e ardhmja e portugezit duket më e pasigurt se kurrë. Forma e Leaos ka qenë e paqëndrueshme këtë sezon dhe situata u përkeqësua pas humbjes 3-0 në shtëpi ndaj Udinese, ku ai u fishkëllye nga tifozët kur u zëvendësua. 26-vjeçari nuk ka shënuar gol që nga 1 marsi, duke shtuar dyshimet mbi rolin e tij në skuadër. Sulmuesi ka një klauzolë lirimi prej 175 milionë eurosh, e vlefshme nga 1 deri më 15 korrik, por drejtuesit e Milanit janë të vetëdijshëm se asnjë klub nuk pritet të paguajë një shumë të tillë pas një sezoni tjetër jo konstant. Sipas raportimeve, kuqezinjtë mund të konsiderojnë oferta mbi 50 milionë euro. Interes për Leaon kanë shfaqur më parë Bayern Munich dhe FC Barcelona, por pa hyrë në negociata konkrete. Ndërkohë, Chelsea kishte ofruar rreth 80 milionë euro disa vite më parë dhe mund të rikthehet në garë. Megjithatë, sipas Gazzettas, Manchester United shihet si një nga opsionet më konkrete për transferimin e portugezit në verë. Kontrata e Leaos me Milanin skadon në qershor të vitit 2028. Deri tani këtë sezon, ai ka regjistruar 10 gola dhe 2 asistime në 26 paraqitje në të gjitha kompeticionet./Klankosova.tv