Me mbështetjen e madhe të tifozerisë, Peja sonte synon ta barazojë serinë gjysmëfinale ndaj Bashkimit

Bashkimi është veç një hap larg finales së madhe në elitën basketbollistike të Kosovës. Që titullin kampion ta 'kontestojë' me Trepçën, prizrenasit duhet sonte të fitojnë në palestrën e zjarrtë "Karagaç" në Pejë, njofton Klankosova.tv. Vendasit nuk kanë më çka të humbin, andaj me mbështetjen e parezervë të tifozërisë së tyre, synojnë që gjysmëfinalen ta dërgojnë në ndeshjen e pestë. Në sezonin e rregullt "Arpagjik't" rezultuan më të mirë, duke fituar tri herë, me vetëm një triumf të pejanëve, por që në "Playoff" kjo s'ka më vlerë. Peja kishte humbur 4-0 nga Ylli gjatë krejt edicionit, por në çerekfinale i eliminuan suharekasit, duke i mundur 2-1, raporton Klankosova.tv. Kjo super ndeshje transmetohet ekskluzivisht në ArtMotion, përmes kanalit Sport 1, me fillim në orën 19:00.