Mbyll karrierën një tjetër futbollist nga gjenerata e artë e Gjermanisë

Jerome Boateng, një nga mbrojtësit më të suksesshëm të futbollit gjerman dhe kampion bote me “Die Mannschaft”, ka shpallur zyrtarisht pensionimin nga futbolli profesionist në moshën 37-vjeçare. Lajmi u konfirmua nga vetë lojtari përmes një mesazhi falënderues për tifozët, bashkëlojtarët dhe klubet ku ka luajtur gjatë karrierës së tij, transmeton klankosova.tv. “Pas më shumë se dy dekadash në fushë, ndihem gati për të hapur kapitullin e radhës në jetën time,” – tha Boateng. “Futbolli më ka dhënë gjithçka: emocione, suksese dhe kujtime që nuk do t’i harroj kurrë.” Boateng u bë i njohur fillimisht te Hamburg, para se të kalonte te Manchester City dhe më pas të shkëlqente te Bayern Munich, me të cilët fitoi tetë tituj të Bundesligës, dy trofe të UEFA Champions League (2013 dhe 2020), si dhe shumë trofe të tjerë kombëtarë dhe ndërkombëtarë. Me Kombëtaren Gjermane ai regjistroi 76 paraqitje dhe u shpall kampion bote në vitin 2014 në Brazil, duke qenë shtyllë e mbrojtjes së trajnerit Joachim Low. Pensionimi i Boateng shënon fundin e një epoke për futbollin gjerman. Ai ishte pjesë e gjeneratës së artë të Bayern Munich së bashku me Philipp Lahm, Thomas Muller dhe Manuel Neuer. Por, tani përflitet se mund të kalojë në rolin e trajnerit, analist apo komentues sportiv ose në role zhvillimi lojtarësh. Tifozët dhe ish-shokët e skuadrës kanë shpërndarë urime dhe mesazhe falënderimi në rrjetet sociale, duke e cilësuar Boateng “një lider dhe shembull për profesionalizëm”.