Luis Enrique, thyen klavikulën në një aksident me biçikletë

Trajneri i Paris Saint-Germain, Luis Enrique, ka pësuar frakturë në klavikulë pas një aksidenti me biçikletë. Klubi ka njoftuar se spanjolli, i cili sezonin e kaluar e udhëhoqi PSG-në drejt titullit të Ligës së Kampionëve, do t’i nënshtrohet një operacioni pas lëndimit të marrë të premten. “Pas një aksidenti me biçikletë të premten, trajneri i Paris Saint-Germain, Luis Enrique, është trajtuar nga shërbimet emergjente dhe do t’i nënshtrohet një operacioni për frakturë të klavikulës. Klubi shpreh mbështetjen e plotë dhe i uron atij shërim të shpejtë. Informacione të tjera do të ndahen me kohë",  thuhet në njoftimin e klubit në platformën X. PSG muajin e kaluar mposhti Tottenham-in në Superkupën e UEFA-s, ndërsa në Ligue 1 i ka fituar tri ndeshjet e para të sezonit. Parizienët ndeshjen e radhës do ta luajnë më 14 shtator kundër Lens.