Trajneri i Paris Saint-Germain, Luis Enrique, tha se ndeshja e së dielës në Kupën e Botës për Klube kundër Inter Miamit do të jetë një takim emocional, ndërsa ai përgatitet të përballet me Lionel Messin, ish-lojtarin e tij te Barcelona.
Messi, i cili iu bashkua PSG-së në vitin 2021 pasi u largua nga Barcelona, tani luan për Inter Miamin së bashku me disa ish-yje të tjerë të Barcelonës, të cilët Luis Enrique i ka menaxhuar më parë - përfshirë Luis Suarez, Sergio Busquets, Jordi Alba dhe trajnerin aktual të Inter Miamit, Javier Mascherano, transmeton Klankosova.tv
“Kjo ndeshje do të jetë e veçantë për mua, pa dyshim - emocionalisht për mua, për klubin dhe për lojtarët që ndanë kohë me Messin”, tha Luis Enrique gjatë një konference për shtyp para ndeshjes të shtunën.
Trajneri spanjoll pranoi aspektin sentimental të përballjes me kaq shumë fytyra të njohura, duke kujtuar sezonin e vitit 2015 që fitoi tripletën në Barcelonë.
“Është bukur t’i shoh përsëri këta lojtarë. Ata janë më shumë sesa thjesht futbollistë për mua - para dhe pas ndeshjes, do të jetë emocionale”, u shpreh ai, transmeton Klankosova.tv
Pavarësisht nostalgjisë, Luis Enrique theksoi rëndësinë konkurruese të ndeshjes, duke thënë se Messi dhe skuadra me përvojë e Inter Miamit i japin PSG-së motivim serioz.
“Nëse nuk mund ta rifitojmë posedimin prej tyre, do të jetë e vështirë - Busquets është ende i njëjti, dhe Leo është i pakrahasueshëm me topin. Suarez ende shënon gola mahnitës dhe Mascherano po i stërvit ata tani - kjo është shumë motivuese për ne”, përfundoi ai. /Klankosova.tv
●●●
VZSHKRIMI NGA
Vanesa Zhugolli
Editorial nga Klan Kosova — ndjek sport dhe zhvillimet e tjera kryesore të vendit.
