Një gol i shënuar në minutën e 121-të i dha shpresë skuadrës së Llapit nga Podujeva për pjesëmarrje historike në garat evropiane, pasi barazoi rezultatin në 1:1 në finalen e madhe të Kupës së Kosovës kundër Dukagjinit që u zhvillua më 12 maj në stadiumin “Fadil Vokrri”.
Ishin “Legjendat" që më pas në penallti triumfuan me rezultatin 4:3, duke fituar trofeun e parë në histori të klubit dhe duke bërë që të arrijnë synimin e shumëkërkuar vitet e fundit - daljen në Evropë.
Kështu pas konfirmimit që do të jenë pjesë e Ligës së Konferencës shorti i 15 qershorit në Nyon të Zvicrës deshi që llapjanët si kundërshtar ta kenë një skuadër shqiptare.
Bëhet fjalë për KF Shkupin që ishte nënkampion në Maqedoni të Veriut.
Ndeshja e parë tashmë mes tyre ka përfunduar. Fitues dolën shkupjanët me shifrat 2:0 në përballjen e parë të luajtur në kryeqytetin maqedonas, derisa sfida e radhës në mes dy klubeve shqiptare pritet të zhvillohet të enjten e 12 korrikut në stadiumin “Fadil Vokrri” në Prishtinë.
KF Llapi
Kapiteni Bujar Idrizi: Ndjenjë e veçantë të përfaqësosh skuadrën e Llapit
Është kapiteni i Llapit, Bujar Idrizi, që shpreson në përmbysje të rezultatit në ndeshjen e kthimit.
Ky për
Klankosova.tv foli edhe për sfidën e parë kundër Shkupit.
“Ndjenjë e veçantë të përfaqësosh skuadrën e Llapit në Kupën e Evropës e në veçanti të luajmë kundër një skuadre shqiptare. Jam shumë i lumtur dhe krenar. Pritja në Shkup ishte shumë e mirë dhe ka qenë lojë mirë e organizuar”.
Në këtë sfidë kishte edhe tifozë të Llapit, Ultras Legjenda, të cilët kishin udhëtuar për këtë përballje.
“Tifozët na kishin munguar shumë si shkak i pandemisë dhe unë jam shumë falënderues për tifozët tanë për përkrahjen e pareshtur që i bënë Llapit në këtë sfidë”.
“Paraqitja për mendimin tim ishte e mirë. Po t’i kishim shfrytëzuar rastet besoj që do të merrte kahje tjetër loja, pasi ky nuk ishte rezultati real i sfidës. Gjithsesi rezultat jo i volitshëm, por jo i pakthyeshëm dhe unë besoj në skuadrën tonë dhe do të luftojmë deri në minutën e fundit për përmbysje”.
Bujar Idrizi
Petrit Miftari: Ka qenë si test i mirë për ne për t'u njohur me nivelet evropiane
Për sfidën e organizimit të ndeshjeve, por edhe shortin për
Klankosova.tv ka folur edhe zëdhënësi i KF Llapit, Petrit Miftari.
Ky i fundit vlerëson se testi i parë i Llapit në Evropë ishte pozitiv, pavarësisht disfatës.
“Në momentin kur e kemi kuptuar shortin se do të përballemi me një skuadër shqiptare si Shkupi realisht jemi ndjerë më të lirshëm për shkak se ky është viti ynë i parë i pjesëmarrjes në garat evropiane, prandaj mendoj që kjo ndeshje ka qenë si test i mirë për ne për t'u njohur me nivelet evropiane, organizimin dhe shumë gjëra tjera”.
“Organizimi ynë ka filluar me të kuptuar kundërshtarin tonë në raundin e parë kualifikues. Pas dy javësh përgatitje në Podujevë kemi zhvilluar fazën përgatitore për tetë ditë të tjera në qytetin e Ohrit. Realisht edhe jemi përforcuar në repartet ku kishim nevojë pas disa largimeve që ndodhën pas përfundimit të Superligës. Ne u organizuam siç i ka hije një klubi evropian, por edhe përkundër rezultatit ne nuk jemi të dëshpëruar dhe do të kërkojmë kualifikimin në ndeshjen e dytë”.
Mikpritja në kryeqytetin maqedonas, sipas Miftarit, nga skuadra shqiptare ishte e nivelit të lartë, për çka është edhe falënderues. Ndërsa, ai thekson se goli i pranuar në minutën e fundit dhemb mjaft shumë.
“Organizimi i ndeshjes ishte i nivelit shumë të lartë. Mikpritja nga klubi i Shkupit ishte shumë e mirë për të cilën u jemi falënderues. Ne zhvilluam një ndeshje të mirë, megjithatë moskonkretizimi i rasteve na kushtoi me pranimin e dy golave, sidomos ky goli në sekondat e fundit dhemb, por nuk na dëshpëron sepse i dimë cilësitë e ekipit dhe forcën e grupit andaj mendoj që kemi gjasa për të kaluar tutje në ndeshjen e kthimit”.
E sfidë e radhës për llapjanët do të jetë ndeshja e kthimit që do të zhvillohet në Prishtinë, pasi stadiumi i tyre “Zahir Pajaziti” në Podujevë nuk i plotëson standardet e krijuar nga UEFA.
“Është e vërtetë që ndeshja e kthimit do të jetë në nivel tjetër të organizimit për shkak të masave të shtetit të Kosovës e cila kërkon që stadiumi të jetë i mbushur vetëm 15 përqind i kapacitetit dhe personat që futen në ndeshje duhet të kenë test PCR negativ. Megjithatë për tifozë ende nuk kemi një vendim i cili pritet të merret ditëve në vijim. Mendoj që edhe ne do të jemi të organizuar mirë për ndeshjen e kthimit, me tifozë apo jo, ne do të tregojmë nivel të organizimit shumë të lartë”.
Petrit Miftari
Bajram Bejtullahu, kryetar i tifozëve: Udhëtimi i djeshëm ka qenë jashtëzakonisht i mirë
Në stadiumin “Toshe Proeski” të enjten e 8 korrikut kishte edhe tifozë nga Podujeva.
Këta të fundit të njohur si “Ultras Legjendat” kishin udhëtuar në formë të organizuar me dy autobusë për të parë sfidën e skuadrës së tyre të zemrës.
Është kryetari i kësaj tifozërie që për portalin
Klankosova.tv tregon për organizimin dhe pritjen që iu bë në Shkup.
“Udhëtimi i djeshëm ka qenë jashtëzakonisht i mirë, kemi udhëtuar shumë tifozë nga Podujeva me dy autobusë dhe shumë vetura private. Në përgjithësi kemi qenë diku rreth 200 tifozë që shkuam në Shkup për t’i përkrahur djelmoshat tanë”.
Mikpritja që u bë në Maqedoni të Veriut po vlerësohet nga Bejtullahu.
“Nuk ka pasur asnjë telashe as gjatë rrugës, por as gjatë kufijve. Jemi mirëpritur shumë mirë nga ana e tifozëve të Shkupit dhe policisë maqedonase të cilët ishim shumë korrekt me ne dhe posaçërisht kryesisë së klubit të Shkupit që na kanë pritur dhe na kanë ndihmuar për biletat dhe çdo gjë që kemi pasur nevojë”.
Bajram Bejtullahu
