Liverpool humbet talentin 30 milionësh për një vit, por befasojnë UEFA-n me Chiesën!

Liverpool ka marrë një goditje të rëndë pasi blerja e verës Giovanni Leoni do të mungojë gjithë sezonin pas një dëmtimi serioz të ligamentit të kryqëzuar të përparmë (ACL). Mbrojtësi 18-vjeçar, i marrë nga Parma për rreth 30 milionë € si pasardhës afatgjatë i Virgil van Dijk, u dëmtua në ndeshjen e tij të parë në Carabao Cup kundër Southampton-it. Trajneri Arne Slot konfirmoi diagnozën dhe tha se rikuperimi pritet të zgjasë rreth një vit. “Është një goditje e rëndë për një lojtar kaq të ri,” tha Slot, duke shtuar se mosha e Leoni i jep shanse më të mira për t’u rikthyer në formë. Falë një rregulli të ri të UEFA-s, klubet mund të zëvendësojnë lojtarët e dëmtuar afatgjatë në listën e tyre A të Champions League. Liverpool e shfrytëzoi këtë mundësi duke shtuar sulmuesin italian Federico Chiesa në skuadër në vend të Giovanni Leoni. Ky vendim për të zëvendësuar një mbrojtës me një sulmues ka ngjallur diskutime, por nënvizon fokusin e klubit te thellësia ofensive për sezonin 2025/26. Dëmtimi i Giovanni Leoni, e lë repartin mbrojtës të Liverpool-it më të dobët, me varësi më të madhe nga Virgil van Dijk, Ibrahima Konaté dhe Joe Gomez. Zërat për përforcime si Marc Guéhi tashmë janë rikthyer në qarkullim. E sa i përket talentit 18-vjeçar, ky vit do të jetë një provë e madhe e qëndrueshmërisë dhe durimit ndërsa ai punon për rikthimin nga dëmtimi.