Edhe pse Liverpool ka qenë në qendër të vëmendjes ditët e fundit për shkak të Mohamed Salah, i cili ka thënë se ndihet sikur klubi e ka "hedhur nën autobus", menaxhmenti i Anfieldit tashmë po bën plane për verën e vitit 2026.
Sipas gazetës gjermane TZ, Reds-ave u është "ofruar" ylli i Bayernit, Dayot Upamecano. Kontrata e mbrojtësit francez me Bayernin skadon në fund të sezonit, që do të thotë se ai mund të negociojë një transferim me klube të tjera pa kompensim sipas rregullit Bosman nga 1 janari. Mundësia e sjelljes së njërit prej qendërmbrojtësve më të mirë të Bundesligës si agjent i lirë ka tërhequr skuadra si Liverpool, Real Madrid dhe Paris Saint-Germain.
Edhe pse Upamecano thuhet se është i lumtur në Mynih, negociatat për një kontratë të re kanë ngecur në dy pika kryesore. Pengesa e parë është kërkesa e agjentit të tij për të përfshirë një klauzolë lirimi prej 65 milionë eurosh.
Bayern në përgjithësi është kundër klauzolave të tilla, megjithëse kohët e fundit kanë bërë lëshime në negociatat me Harry Kane dhe Jamal Musiala. Një problem tjetër janë pagat. Upamecano kërkon një pagë vjetore prej 18 milionë eurosh, që është rreth 346 mijë euro në javë, dhe gjigantët bavarezë nuk janë gati të ofrojnë një shumë të tillë.
Pikërisht këtu e sheh mundësinë e tij Liverpooli, i cili thuhet se po e monitoron nga afër situatën dhe është gati të reagojë nëse bëhet e qartë se lojtari ndërkombëtar francez po largohet nga Bavaria. Upamecano është identifikuar si një alternativë në rast se transferimi i kapitenit të Crystal Palace, Marco Guehi, dështon. Trajneri Arne Slot ka nevojë për një qendërmbrojtës të ri për të përgatitur ekipin për epokën pas Virgil van Dijk, ndërsa rrit edhe konkurrencën duke pasur parasysh lojën e ndryshueshme të Ibrahima Konate. /Klankosova.tv
●●●
VZSHKRIMI NGA
Vanesa Zhugolli
Editorial nga Klan Kosova — ndjek sport dhe zhvillimet e tjera kryesore të vendit.
