Lajmet e fundit
16:22 - Familjes Ademaj i aprovohet kërkesa për rivarrim të së bijës
Është pranuar kërkesa e familjes Ademaj për zhvarrosjen e trupit të Liridona Ademajt, e cila u vra në mbrëmjen e 29 nëntorit në fshatin Sinidoll afër Prishtinës.
Këtë e ka bërë të ditur për Klankosova.tv vëllai i saj Leonard Ademaj.
Ai bëri me dije se rivarrimi do të bëhet nesër nga ora 14:00.
Përndryshe kërkesa është bërë nga Bajram dhe Zade Ademaj, prindërit e Liridona Ademajt.
Në kërkesën e drejtuar prokurores Besa Limani shkruan:
“Kjo është një procedurë dhe përjetim tepër i rëndë për neve dhe këtë vendim e kemi marrë me shumë vështirësi, por duam që ajo të prehet në shtëpinë e saj”, shkruan në kërkesën që Klan Kosova e ka siguruar.
Sot është mbajtur seanca dëgjimore ndaj ish-bashkëshortit të saj Naim Murselit, ish-bashkëshortit të Liridona Murselit, dhe ndaj dy të dyshuarve të tjerë.
12:10 - Vrasja e Liridona Ademajt: Nga një muaj paraburgim ndaj tre të dyshuarve
Nga një muaj paraburgim iu është caktuar tre të dyshuarve, Naim Murselit dhe dy të tjerëve për vrasjen e Liridona Ademajt.
Vendimi është marrë nga Gjykata Themelore e Prishtinës.
Kjo u konfirmua për Klankosova.tv nga Mirlinda Gashi, zëdhënëse e kësaj gjykate.
“Vendimi është marrë. Nga një muaj paraburgim për tre të dyshuarit”, tha ajo.
Në ndërkohë, Gjykata Themelore e Prishtinës ka lëshuar një njoftim.
Në njoftim thuhet se ata dyshohen për tre vepra penale.
11:45 -Në pritje të vendimit ndaj tre të dyshuarve për vrasjen e Liridona Ademajt
Ende nuk është përcaktuar vendimi ndaj Naim Murselit, dhe dy të dyshuarve të tjerë për vrasjen e Liridona Ademajt.
Zëdhënësja e Gjykatës Themelore të Prishtinës, Mirlinda Gashi, tha janë në pritje të vendimit.
"Ende nuk është marrë vendimi, jemi në pritje", tha ajo për Klankosova.tv
Sot në Gjykatën Themelore është mbajtur seanca dëgjimore ndaj Naim Murselit, ish-bashkëshorti i tanimë të ndjerës Liridona Ademajt, dhe dy të tjerëve.
Murseli është i dyshuari kryesor për organizimin e ngjarjes makabre.
Ai e ka pranuar se ka paguar për vrasjen e gruas së tij.
Dyshohet se Naim Murseli, i ka paguar 30 mijë euro për ta vrarë Liridona Ademajn.
_________________________________________________________________________________________________
11:06 - Kjo është kërkesa e prindërve të Liridona Ademajt për zhvarrosjen e trupit të saj (DOKUMENT)
Bajram dhe Zade Ademaj, kanë bërë kërkesë për zhvarrosjen e trupit të vajzës së saj Liridona Ademaj, e cila u vra në mbrëmjen e 29 nëntorit në fshatin Sinidoll afër Prishtinës.
Në kërkesën e drejtuar prokurores Besa Limani shkruan:
“Kjo është një procedurë dhe përjetim tepër i rëndë për neve dhe këtë vendim e kemi marrë me shumë vështirësi, por duam që ajo të prehet në shtëpinë e saj”, shkruan në kërkesën që Klan Kosova e ka siguruar.
Sot është mbajtur seanca dëgjimore ndaj ish-bashkëshortit të saj Naim Murselit, ish-bashkëshortit të Liridona Murselit, dhe ndaj dy të dyshuarve të tjerë.
Pas pak pritet të merren vendimi për caktimin e masës së paraburgimit, njofton Klankosova.tv.
10:56 - Vëllai i Liridona Ademajt: Ajo ishte një grua e fortë, një motër e fuqishme, një heroinë për fëmijët e vet
Leonard Ademaj, vëllai i të vrarës Liridona Ademaj, sot ka folur para Gjykatës Themelore të Prishtinës pas përfundimit të seancës dëgjimore ndaj të dyshuarve për vrasjen e saj, Naim Murselit, bashkëshort, dhe dy personave tjerë.
Vëllai i të ndjerës ka theksuar se Liridona është vrarë në mënyrë mizore dhe në formë makabre.
“Ajo ishte një grua e fortë, një motër e fuqishme, një heroinë për fëmijët e vet siç na tregoi që ishte e fortë. Ne po e përmbajmë veten sepse ajo nuk donte të na shihte të dobët. Atë ditë Liridona ishte në shtëpi tonë i thash mos shko rri, më tha po shkojë pak me fëmijë, u thash fëmijëve rrini me dajën, bile edhe fëmijët më thanë se ‘nuk do të vijmë derisa të vijë daja i madh nga Gjermania'”.
“Liridona shkoi, pasi ka mbërri mirë në Prishtinë tha se janë duke dashë të shkojnë në Graçanicë me ngrënë bukë, unë kam qenë duke punu gruaja m’ka thanë se e kanë vra Liridonën”, ka thënë Ademaj./Klankosova.tv
10:43 -Seanca për vrasjen e Liridona Ademajt, njëri nga të dyshuarit mbrohet në heshtje
Skënder Gojani, avokati i njërit prej të dyshuarve për vrasjen e Liridona Ademajt, Granit Plavës, ka folur për media pas seancës së sotme .
Ai bëri me dije se klienti i tij është mbrojtur në heshtje.
10:24 -Është duke u zhvilluar seanca gjyqësore ndaj Naim Murselit dhe dy të tjerëve, për vrasjen e Liridona Ademajt.
Kjo seancë po mbahet pa praninë e mediave, njofton Klan Kosova.
Liridona Ademaj, u vra mbrëmjen e 29 nëntorit.
I dyshuari kryesor është ish-bashkëshorti Naim Murseli, i cili dyshohet se është organizatori kryesor për vrasjen e saj.
Dyshohet se ai pagoi 30 mijë euro për kryerjen e këtij akti makabër.
_________________________________________________________________________________________________
09:30 - Kanë arritur në gjykatë ish-bashkëshorti Naim Murseli, dhe dy të dyshuarit e tjerë për vrasjen e Liridona Ademajt.
Pas pak pritet të nisë edhe seanca fillestare ndaj tyre.
Aty, pritet të caktohet edhe masa e paraburgimit prej 30 ditësh.
Raportohet se Naim Murseli, është futur në gjykatë nga një hyrje e pasme, larg mediave. ____________________________________________________________________________________________________
09:22 - Kolektivi për Mendim dhe Veprim Feminist me aksion para gjykatës për vrasjen e Liridona Ademajt
Kolektivi për Mendim dhe Veprim Feminist është duke mbajtur një aksion simbolik para Gjykatës Themelore të Prishtinës para nisjes së seancës dëgjimore ndaj Naim Murselit, bashkëshortit të Liridona Ademaj, si dhe dy të dyshuarve tjerë për vrasjen e saj.
“Nuk ka paqe pa sigurinë e grave” është parulla që u ngrit nga aktivistet para objektit të Themelores.
Naim Murseli, burri i tanimë të ndjerës, Liridona Ademaj, e ka pranuar se e ka porositur vrasjen e gruas së tij.
Thuhet se Murseli, ka paguar 30 mijë euro për vrasjen e saj.
09:09 - Vëllai i Liridona Ademajt arrin në gjykatë
Sot në Gjykatën Themelore të Prishtinës do të mbahet seanca fillestare ndaj Naim Murselit dhe dy të dyshuarve të tjerë për vrasjen e Liridona Ademajt.
Seanca pritet të nisë në ora 09:30.
Siç raporton KosovaPress, aty është parë se ka arritur edhe vëllai i të ndjerës, Leonardi, përcjell Klankosova.tv
Deri tash, sipas informatave, ende nuk kanë arritur të dyshuarit për këtë vrasje të planifikuar.
Kurse, në orën 09:30, Kolektivi për Mendim dhe Veprim Feminist bashkë me aktivistë feministë të pavarur, do të organizojnë një aksion simbolik pranë Pallatit të Drejtësisë, ku do të zhvillohet seanca gjyqësore për vrasjen e Liridona Ademajt.
Pas përfundimit të seancës, gjykatësi i procedurës paraprake pritet të caktojë nga një muaj paraburgim për të dyshuarit.
07:00 - Naim Murseli dhe dy të dyshuarit e tjerë për vrasjen e Liridona Ademajt, dalin sot para gjykatës
Sot në Gjykatën Themelore të Prishtinës do të mbahet seanca dëgjimore ndaj Naim Murselit, i dyshuari kryesor për organizimin e vrasjes së gruas së tij, Lirdona Ademajt, dhe ndaj dy të tjerëve.
Seanca nis nga ora 09:30.
30 vjeçarja, Liridona Ademaj, u vra më 29 nëntor.
Naim Murseli, burri i tanimë të ndjerës, Liridona Ademaj, e ka pranuar se e ka porositur vrasjen e gruas së tij.
Thuhet se Murseli, ka paguar 30 mijë euro për vrasjen e saj.
