Lirimi i policëve s’ka alternativë - zgjedhje të reja veç sipas ligjit, thotë Kurti nga Brukseli

Kryeministri i vendit, Albin Kurti, pas takimit që pati në Bruksel me përfaqësuesin e lartë të BE-së, Josep Borrell, dhe ndërmjetësin Mirsolav Lajçak, ka thënë se Serbia është duke ikur nga situata dhe nga një zgjidhje e mundshme. Ai tha se me Borrellin e Lajçakun u pajtuam se lirimi i menjëhershëm e i pakusht i tre policëve të Kosovës dhe deeskalimi me normalizim të raporteve s’kanë alternativë. “Kjo e fundit ka nevojë për një sekuencim të plotë, të hollësishëm dhe të balancuar të marrëveshjes bazë dhe aneksit që u bë në Ohër. Përshtypja ime është që në këtë situatë jemi si rezultat i mos-nënshkrimit të kësaj marrëveshjeje bazike dhe mos-insistimit në zbatim të plotë të asaj marrëveshjeje”, tha Kurti, njofton Klankosova.tv. Kurti, tutje tha se Kosova është e hapur për zgjedhje të parakohshme, por me kushtin që ato të kenë zgjidhje ligjore. “S’mund të bëhen zgjedhje të jashtëzakonshme jashtë ligjit. Siç e parasheh ligji në Kosovë, ta zëmë me nënshkrime të qytetarëve, të cilët mbledhin përmes një peticioni vullnetin e tyre që t’ia përfundojnë mandatin një kryetari të komunës, kjo është një zgjidhje brenda ligjit. Kjo është e mundshme në Kosovë, por s’mund të bëjmë zgjidhje të cilat nuk janë ligjore, sepse ato janë problem, s’janë zgjidhje”, tha Kurti. Më tej, shefi i qeverisë tha se Borrellit ia ka bërë më dije se prezenca e Policisë së Kosovës në godinat e komunave është e obligueshme duke pasur parasysh se ekstremistët e dhunshëm “vazhdojnë të mos jenë prapa grilave”. Rrini të informuar mbi zhvillimet kryesore duke u bërë pjesë e komunitetit tonë në Viber BONUS: Merreni aplikacionin tonë në Android dhe iOS